byసూర్య | Tue, Jan 18, 2022, 08:18 PM

చెట్టు నీడ అందరిని కాపాడుతుంది. కానీ ఆ చెట్టే కూలితే పరిస్థితి ఏమిటీ. ఖమ్మంలో విషాద ఘటన చోటుచేసుకుంది. భారీ రావి చెట్టు అమాంతం కూలిపోవడంతో దారుణం జరిగిపోయింది. క్రికెట్ ఆడుకుంటున్న చిన్నారులపై భారీ వృక్షం పడడంతో ఇద్దరు చిన్నారులు అక్కడికక్కడే చనిపోగా మరో ముగ్గురికి గాయాలయ్యాయి. ఈ విషాద ఘటన పట్టణంలోని బ్రాహ్మణ బజార్‌లో జరిగింది. సాయంత్రం వేళ చిన్నారులు సరదాగా క్రికెట్ ఆడుకుంటున్న సమయంలో రావిచెట్టు అమాంతం కుప్పకూలింది. పక్కనే ఉన్న శిథిలమైన ప్రహరీ గోడ మీద పడింది. చెట్టు పడడంతో గోడ కుప్పకూలి ఆడుకుంటున్న చిన్నారులపై పడినట్లు తెలుస్తోంది. రాళ్ల కింద పడి తీవ్ర గాయాలపాలై ఇద్దరు చిన్నారులు ఆయుష్(12), దిగంత్(8) ప్రాణాలు కోల్పోయారు. మరో ముగ్గురు సాకేత్(8), అనుముల్(5), చరణ్ సాయి(5) స్వల్ప గాయాలతో బయటపడ్డారు. కళ్లు ముందే ఆడుకుంటున్న చిన్నారులు నిమిషాల వ్యవధిలోనే విగతజీవులుగా కనిపించడంతో తల్లిదండ్రులు శోకసంద్రంలో మునిగిపోయారు. ఎలాంటి ఈదురు గాలులు రాకున్నా చెట్టు ప్రమాదవశాత్తూ కూలిపోవడం స్థానికులను షాక్‌కి గురిచేస్తోంది.