by సూర్య | Mon, Sep 16, 2024, 08:40 PM

ప్రముఖ హాలీవుడ్‌ నిర్మాణసంస్థ డిస్నీ తెరకెక్కిస్తున్న ‘ముఫాసా’: ది లయన్‌ కింగ్‌’.   ప్రస్తుతం చిత్రీకరణ దశలో ఉంది. ఆరోన్‌ స్టోన్‌, కెల్విన్‌ హ్యారిసన్‌ జూనియర్‌ తదితరులు నటిస్తున్నారు. తాజాగా ఈ సినిమా తెలుగు ట్రైలర్‌ను  విడుదల చేశారు. ఇందులో కీలకమైన ముఫాసా పాత్రకు మహేశ్ బాబు డబ్బింగ్‌ చెప్పారు. ‘‘అప్పుడప్పుడు ఈ చల్లని గాలి.. నా ఇంటి నుంచి వచ్చే జ్ఞాపకాలను గుర్తుచేస్తున్నట్టు అనిపిస్తుంది. అంతలోనే అవి మాయమవుతున్నాయి’’ అంటూ మహేశ్‌ చెప్పే డైలాగ్‌లు ఆకట్టుకునేలా ఉన్నాయి. అద్భుతమైన విజువల్స్‌తో మహేశ్‌ డైలాగ్స్‌తో ట్రైలర్‌ ఆద్యంతం ఆసక్తికరంగా సాగింది.ఈ మేరకు మహేశ్ ట్వీట్‌ చేశారు. ‘ముఫాసా’కు వాయిస్‌ ఓవర్‌ ఇవ్వడంపై మహేశ్‌ ఆనందం వ్యక్తంచేశారు. ‘‘మనకు తెలిసిన, ఇష్టపడే పాత్రకు కొత్త అంకం. తెలుగులో ‘ముఫాసా’కు వాయిస్‌ని అందించినందుకు చాలా సంతోసంగా ఉంది. ఈ క్లాసిక్‌కి నేను విపరీతమైన అభిమానిని కావడంతో ఇది నాకెంతో ప్రత్యేకంగా ఉంది’’ అని ట్వీట్‌లో పేర్కొన్నారు. భారీ బడ్జెట్‌తో రూపుదిద్దుకుంటున్న ఈ చిత్రం క్రిస్మస్‌ కానుకగా డిసెంబర్‌ 20న ప్రపంచవ్యాప్తంగా ప్రేక్షకుల ముందుకు రానుంది. ఈ సినిమా హిందీ వెర్షన్‌లో ముఫాసా పాత్రకు షారుక్‌ఖాన్, ముఫాసా చిన్నప్పటి పాత్రకు ఆయన తనయుడు అబ్రం వాయిస్‌ ఓవర్‌ అందించారు. ‘‘ముఫాసాకు అద్భుతమైన వారసత్వం ఉంది. అడవికి అతడే రారాజుగా ఉంటాడు. ఒక తండ్రిగా ఆ పాత్ర నా మనసుకు చేరువైంది. బాల్యం నుంచి రాజుగా ఎదగడం వరకూ ముఫాసా జీవితం ఎలా సాగిందనే విషయాన్నిఈ సినిమా చెబుతుంది. 2019లో వచ్చిన ‘ది లయన్‌ కింగ్‌’ తర్వాత మరోసారి ఈ పాత్ర కోసం వర్క్‌ చేయడం  ప్రత్యేకంగా ఉంది. మరీ ముఖ్యంగా నా పిల్లలతో కలిసి వర్క్‌ చేయడం ఆనందంగా అనిపిస్తుంది’’ అని షారుక్‌ తెలిపారు. ఇందులోని సింబా పాత్రకు షారుక్‌ పెద్ద తనయుడు ఆర్యన్‌ ఖాన్‌  వాయిస్‌ ఇచ్చారు.