byసూర్య | Sun, Oct 27, 2024, 07:42 PM

తెలంగాణలో వర్షాలపై హైదరాబాద్ వాతావరణ కేంద్రం అధికారులు కీలక అప్డేట్ ఇచ్చారు. రాష్ట్రంలో మరో రెండ్రోజుల పాటు భారీ వర్షాలు కురిసే ఛాన్స్ లేదని చెప్పారు. పలు జిల్లాల్లో మాత్రం తేలికపాటి చిరు జల్లులు కురవొచ్చునని చెప్పారు. అక్టోబర్ 29 నుంచి మూడ్రోజుల పాటు వర్షాలు కురుస్తాయని చెప్పారు. అప్పటి వరకు రాష్ట్రంలో పొడి వాతావరణం ఉంటుందన్నారు. ఇక గత కొద్ది రోజులుగా తెలంగాణలో భిన్న వాతావరణం ఉంటుంది. మధ్యాహ్నం సమయంలో ఉష్ణోగ్రతలు విపరీతంగా పెరుగుతున్నాయి. ఉక్కపోతతో ప్రజలు అల్లాడిపోతున్నారు. ఇక సాయంత్రం వాతావరణం చల్లబడుతుండగా.. అర్ధరాత్రి దాటిన తర్వాత తెల్లవారుజామన చలి వాతావరణం ఉంటుంది. ఉష్ణోగ్రతలు పడిపోతున్నాయి.

శనివారం ఖమ్మంలో అత్యధికంగా 35 డిగ్రీల అధిక పగటి ఉష్ణోగ్రత నమోదైనట్లు వాతావరణశాఖ అధికారులు వెల్లడించారు. ఆ తర్వాత భద్రాచలంలో 34 డిగ్రీలుగా ఉష్ణోగ్రత నమోదైంది. నిజామాబాద్‌లో 33.5 డిగ్రీలు, రామగుండం, మెదక్ పట్టణాల్లో 33 డిగ్రీల చొప్పున ఉష్ణోగ్రతలు నమోదైనట్లు చెప్పారు. దీంతో ఆ ప్రాంత ప్రజలు తీవ్ర వేడి, ఉక్కపోతతో అల్లాడిపోయారు. పగటి పూట ఎండలు, వేడి గాలులకు ఉక్కపోతతో ఇబ్బంది పడుతున్నారు.ఇక హైదరాబాద్‌లో గరిష్ట ఉష్ణోగ్రత 31 డిగ్రీలు నమోదనైట్లు అధికారులు చెప్పారు. రాత్రి సమయంలో 20 డిగ్రీలకు ఉష్ణోగ్రతలు పడిపోతున్నాయి. తెలంగాణలో అత్యల్ప పగటి ఉష్ణోగ్రతలు మహబూబ్ నగర్ జిల్లాలో 29 డిగ్రీలు నమోదైంది.

ఇక దానా తుపాను ముప్పు ఒడిశా, పశ్చిమ బెంగాల్‌తో పాటుగా ఏపీ, తెలంగాణకు తప్పింది. అయితే ఏపీలోని ఉత్తర కోస్తా ,యానాం ప్రాంతాల్లో తేలికపాటి నుండి ఒక మోస్తరు వర్షాలు కురిసే ఛాన్స్ ఉందన్నారు. ఒకట్రెండు చోట్ల చిరు జల్లులు పడతాయని అమరావతి వాతావరణ కేంద్రం అంచనావ వేసింది. ఏపీలోని దక్షిణ కోస్తా జిల్లాల్లోనూ ఒకట్రెండు చోట్ల తేలికపాటి వర్షాలు పడే అవకాశం ఉన్నట్లు చెప్పారు. రాయలసీమ జిల్లాల్లో రెండు రోజులపాటు తేలికపాటి వర్షాలు కురిసే అవకాశం ఉందన్నారు. ఒకట్రెండు చోట్ల మోస్తరు వర్షాలు పడతాయని ప్రజలు అప్రమత్తంగా ఉండాలని సూచించారు.

ప్రస్తుతం ఉత్తర ఒడిశాలో అల్పపీడనం కొనసాగుతోందని భారత వాతావరణ శాఖ వెల్లడించింది. రానున్న 6 గంటల్లో ఇది మరింత బలహీనపడుతుందని అంచనా వేస్తున్నారు. దిగువ ట్రోపో ఆవరణంలో వాయువ్య దిశ నుంచి గాలులు వీస్తున్నాయని చెప్పారు. తీరం వెంట 80 నుంచి 100 కి.మీ వేగంతో గాలులు వీస్తున్నాయని చెప్పారు.