byసూర్య | Wed, Sep 18, 2024, 09:58 PM

ప్రస్తుత రాజకీయాల్లో విమర్శలు బౌండరీలను దాటుతున్నాయి. రాజకీయంగా విమర్శలు కాకుండా.. వ్యక్తిగత దూషణలు, వ్యక్తిత్వ హననం చేసే మాటలు, సవాళ్లతో నేతలు ఎప్పుడో బౌండరీలు దాటేశారు. ఈ క్రమంలోనే.. తెలంగాణ నేతలు కూడా ఈ మధ్య ఘాటు విమర్శలు చేస్తున్నారు. ఇందులో భాగంగానే.. ఖైరతాబాద్‌ ఎమ్మెల్యే దానం నాగేందర్‌ కీలక వ్యాఖ్యలు చేశారు. కాంగ్రెస్ అగ్రనేత రాహుల్ గాంధీపై.. బీజేపీ నేతలు చేస్తున్న విమర్శలను నిరసిస్తూ గాంధీ భవన్ వద్ద కాంగ్రెస్ నిర్వహించిన ధర్నాలో దానం నాగేందర్ మాట్లాడుతూ.. హిమాచల్ ప్రదేశ్‌లోని మండి బీజేపీ ఎంపీ, సినీ నటి కంగనా రనౌత్‌పై సంచలన వ్యాఖ్యలు చేశారు.

సినిమాల్లో బోగం వేషాలు వేసుకునే కంగనా రనౌత్‌కు రాహుల్ గాంధీని విమర్శించే నైతిక హక్కు లేదంటూ దానం నాగేందర్ వివాదాస్పద వ్యాఖ్యలు చేశారు. దేశం కోసం త్యాగాలు చేసిన గాంధీ కుటుంబంపై బీజేపీ నాయకులు చేస్తున్న విమర్శలను ప్రజలు సహించరని మండిపడ్డారు. రాహుల్ గాంధీ మీద విమర్శలు గుప్పించిన ఢిల్లీ మాజీ ఎమ్మెల్యే తన్వీందర్ సింగ్ మీద.. ఇతర బీజేపీ నాయకులపై సుప్రీం కోర్టు, ఢిల్లీ కోర్టు, డీజీపీలు చర్యలు తీసుకోవాలంటూ దానం నాగేందర్ డిమాండ్ చేశారు.

 కాగా.. దానం నాగేందర్ చేసిన వ్యాఖ్యలు ఇప్పుడు సర్వత్రా చర్చనీయాంశంగా మారాయి. రాజకీయంగా విమర్శలు చేసినప్పుడు అదే స్థాయిలో విమర్శలు చేయాలి కానీ.. ఓ మహిళా నేత, అందులోనూ ఓ ప్రముఖ నటి, పద్మశ్రీ అవార్డు గ్రహీత అయిన కంగనా రనౌత్‌పై వ్యక్తిత్వ దూషణలు చేయటం సరికాదన్న అభిప్రాయం వ్యక్తమవుతోంది. కాగా.. నటులు పోషించే పాత్రలతో పోల్చి వారి వ్యక్తిత్వాన్ని కించపరిచటం, వారి వృత్తిని కించపరిచేలా మాట్లాడటం సరికాదంటూ విమర్శలు వ్యక్తమవుతున్నాయి. ఇప్పటికే.. దానం నాగేందర్ పలు సందర్భాల్లో వివాదాస్పద వ్యాఖ్యలు చేస్తూ.. వార్తల్లో నిలిచారు. కాగా.. అసెంబ్లీ సాక్షిగా బీఆర్ఎస్ నేతలకు పరుష పదజాలంతో వార్నింగులు ఇవ్వటం సర్వత్రా చర్చనీయాంశంగా మారిన విషయం తెలిసిందే.

మరోవైపు.. ఎప్పుడూ ఏవో వివాదాస్పద కామెంట్లు చేస్తూ వార్తల్లో నిలిచే కంగనా రనౌత్.. ఇటీవలే తాన స్వీయ దర్శకత్వంలో తీసిన ఎమర్జెన్సీ చిత్రంతో మరోసారి వార్తల్లో నిలిచారు. దివంగత ప్రధాని ఇందిరా గాంధీ జీవితం ఆధారంగా ఎమర్జెన్సీ చిత్రం తెరకెక్కించిన విషయం తెలిసిందే. ఇందులో.. సిక్కుల మనోభావాలను దెబ్బతీశారంటూ అభ్యంతరం వ్యక్తం చేయటంతో.. ఈ సినిమా విడుదలకు బ్రేకులు పడ్డాయి.