byసూర్య | Tue, Jun 18, 2024, 07:51 PM

మహబూబాబాద్ జిల్లా బయ్యారం మండలం కోటగడ్డ గ్రామంలో విషాదం చోటు చేసుకుంది. పెద్దలు పెళ్లికి ఒప్పుకోకపోవటంతో ప్రేమ జంట ఆత్మహత్యాయత్నం చేసింది. ఈ ఘటనలో ప్రియురాలు మృతి చెందగా.. ప్రియుడు చావు బతుకుల మధ్య కొట్టుమిట్టాడుతున్నాడు. వివరాల్లోకి వెళితే.. గ్రామానికి చెందిన కొట్టెం లక్ష్మీనారాయణ, నీలావతి దంపతులకు ఇద్దరు కుమార్తెలు. వీరు చాలా కాలంగా యాదాద్రి భువనగిరి జిల్లాలోని ఓ కోళ్ల ఫారంలో పని చేస్తూ.. అక్కడే జీవనం సాగిస్తున్నారు. మూడేళ్ల క్రితం పెద్ద కుమార్తె రవళికి ఓ యువకుడితో వివాహం జరిపించారు. అయితే పెళ్లి జరిగిన రెండు నెలలకే నవ దంపతుల మధ్య మనస్పర్థలు వచ్చి విడిపోయారు.

అప్పట్నుంచి రవళి తల్లిదండ్రుల వద్దే ఉంటూ కోళ్లఫారంలో పని చేస్తుంది. అయితే స్వగ్రామం కోటగడ్డకు వచ్చిపోయే క్రమంలో పక్కింట్లో ఉండే రవీందర్ అనే అబ్బాయితో రవళి ప్రేమలో పడింది. ఆ తర్వాత పెళ్లి చేసుకుంటామని ఇంట్లో చెప్పగా వారు ఒప్పుకోలేదు. దీంతో ఇంట్లో నుంచి వెళ్లిపోయి ప్రేమ పెళ్లి చేసుకున్నారు. అనంతరం శ్రీకాకుళంలో కాపురం పెట్టారు. వీరు వెళ్లిపోయాక.. అబ్బాయి తల్లిదండ్రులు మహబూబా‌బాద్ పోలీసులకు, అమ్మాయి తల్లిదండ్రులు భునగిరి పోలీసులకు ఫిర్యాదు చేశారు. మిస్సింగ్ కేసు నమోదు చేసుకున్న పోలీసులు.. ఇటీవల వారిని తీసుకొచ్చి కౌన్సిలింగ్ ఇచ్చారు.

మూడ్రోజుల క్రితం రవళి రవీందర్ ఇంటికి వెళ్లింది. తాను అతడితోనే ఉంటానని తేల్చి చెప్పింది. దీంతో పెద్దల సమక్షంలో తల్లిదండ్రులు పంచాయితీ పెట్టారు. మనస్థాపం చెందిన రవళి, రవీందర్ ఇంట్లోకి వెళ్లి తలుపులు వేసుకున్నారు. ఎలాగు కలిసి బతకలేమని.. కలిసి చనిపోవాలని నిర్ణయం తీసుకున్నారు. రవళి ఉరేసుకొని చనిపోగా.. రవీందర్ ఉరి తెగిపోటవంతో కత్తితో గొంతు కోసుకున్నాడు. రక్తపు మడుగులో పడి ఉన్న రవీందర్‌ను కుటుంబ సభ్యులు ఆసుపత్రికి తరలించారు. ప్రస్తుతం అతడికి ఆసుపత్రిలో చికిత్స అందుతోంది. తన కూతురికి మాయ మాటలు చెప్పి తీసుకెళ్లటమే కాకుండా హత్య చేశారని రవీందర్ కుటుంబంపై తండ్రి లక్ష్మీనారాయణ ఆరోపణలు చేశారు. ఆయన ఫిర్యాదు మేరకు కేసు నమోదు చేసుకున్న పోలీసులు విచారణ చేపట్టారు. ఇలా వీరి ప్రేమ వ్యవహారం రెండు కుటుంబాల్లో విషాదాన్ని నింపింది.