byసూర్య | Mon, Apr 22, 2024, 07:51 PM

తెలంగాణలో గత రెండు మూడు రోజులుగా వర్షాలు కురుస్తున్నాయి. మెున్నటి వరకు ఎండలు దంచికొట్టగా ప్రస్తుతం చల్లని వాతావరణం నెలకొని ఉంది. ముండు వేసవిలో కురుస్తున్న వర్షాలతో నగర ప్రజలు ఉపశమనం పొందుతున్నారు. అదే సమయంలో జిల్లాల్లో తీవ్ర పంట నష్టం వాటిల్లటంతో రైతులు ఆవేదన వ్యక్తం చేస్తున్నారు. చేతికొచ్చిన పంట నేలరాలిపోయిందని కన్నీరు పెట్టుకుంటున్నారు.

ఈ క్రమంలో రాష్ట్రంలో మరో మూడ్రోజుల పాటు వర్షాలు కురుస్తాయని వాతావరణశాఖ అధికారులు తెలిపారు. ఉరుములు, మెరుపులతో వర్షాలు పడతాయన్నారు. ఆ సమయంలో గంటకు 30-40 కిలోమీటర్ల వేగంతో గాలులు వీస్తాయని వాతావరణశాఖ అధికారులు తెలిపారు. నేడు నిర్మల్, ఆసిఫాబాద్, మంచిర్యాల, ఆదిలాబాద్, హనుమకొండ, నిజామాబాద్, సంగారెడ్డి, భువనగిరి, సూర్యాపేట జిల్లాలో మోస్తారు వర్షాలు కురవనున్నాయి. ఈ మేరకు ఆయా జిల్లాలకు ఎల్లో అలర్ట్ జారీ చేశారు. ఇక హైదరాబాద్‌లోనూ జల్లులు పడే ఛాన్స్ ఉందని అధికారులు తెలిపారు. పట్టణంలోని కొన్ని ప్రాంతాల్లో వర్షాలు కురుస్తాయన్నారు. సాయంత్రం వరకు పొడి వాతావరణం ఉంటుందని ఆ తర్వాత వర్షం పడొచ్చునని అంచనా వేస్తున్నారు.