byసూర్య | Sat, Apr 20, 2024, 07:23 PM

హైదరాబాద్‌లోనే అతిపెద్ద హోం షాపింగ్ స్టోర్ ఏంటి అంటే టక్కున గుర్తొచ్చేది 'ఐకియా'. అందులో.. ఒక ఇంట్లోకి కావాల్సిన ప్రతి ఒక్క వస్తువు.. దొరుకుతుంది. మంచి క్వాలిటీతో పాటు సరసమైన ధరలకే అన్ని వస్తువులు దొరకటంతో.. నగరవాసుల నుంచి ఐకియాకు విశేష స్పందన లభిస్తోంది. అయితే.. ఒక చిన్న మిస్టేక్‌తో ఐకియా ఇప్పుడు వార్తల్లో నిలిచింది. అంతేకాదు.. జరిమానా కూడా కట్టాల్సి వచ్చింది. మనం ఎక్కడికైనా షాపింగ్‌కు వెళ్లి ఏదైనా కొంటే దానికి అదనంగా ప్యాకింగ్, క్యారీ బ్యాగ్ ఛార్జీలు వసూలు చేయకూడదన్నది రూల్. అందులోనూ.. ఆ దుకాణానికి సంబంధించిన కంపెనీ లోగో ఉంటే.. ఇక ఆ ఛార్జీల విషయమే మర్చిపోవాలి. కానీ.. హైదరాబాద్‌లో ఉన్న అతిపెద్ద ఐకియా స్టోర్ ఈ చిన్న విషయాన్ని మర్చిపోయినట్టుంది. ఐకియా షాపింగ్ మాల్‌కు సంబంధించిన కంపెనీ లోగో ఉన్న పేపర్ క్యారీ బ్యాగ్‌కు వినియోగదారుని నుంచి.. రూ.20 వసూలు చేసింది. దీంతో.. ఆ కస్టమర్ డిస్ట్రిక్ట్ కన్స్యూమర్ డిస్ప్యూట్స్ కమిషన్‌కు ఫిర్యాదు చేయగా.. జరిమానా కూడా పడింది. ఇప్పుడు ఇది నగరవ్యాప్తంగా తీవ్ర చర్చకు దారి తీసింది. డిస్టిక్ కన్స్యూమర్ డిస్పూట్స్ కమిషన్ జరిమానా విధించింది.

ఐకియా స్టోర్‌లో ఓ వినియోగదారుడు.. 816 రూపాయల విలువైన వస్తువులు తీసుకున్నాడు. వాటికి బిల్ కట్టేటప్పుడు.. షాపింగ్ మాల్ సిబ్బంది అతని దగ్గర నుంచి.. కంపెనీ లోగో ఉన్న క్యారీ బ్యాగ్‌కు కూడా 20 రూపాయల బిల్ వేశారు. క్యారీ బ్యాగ్‌కు కూడా డబ్బులు తీసుకోవటమేంటీ అని.. షాపింగ్ మాల్ సిబ్బందిని ప్రశ్నిస్తే.. అక్కడి నుంచి సరైన స్పందన రాలేదు. దీంతో.. ఆ వినియోగదారుడు తీవ్ర అసహనానికి గురై.. నేరుగా రంగారెడ్డి జిల్లా వినియోగదారుల హక్కుల కమిషన్‌ను ఆశ్రయించాడు.

దీంతో.. ఆ కమిషన్ ఐకియా యాజమాన్యంపై తీవ్ర ఆగ్రహం వ్యక్తం చేసింది. స్టోర్‌కు వచ్చే కస్టమర్లకు తాము అన్ని విధాల సౌకర్యాలు కల్పిస్తామని చెప్పే ఉద్దేశంతోనే వారి లోగోతో క్యారీ బ్యాగ్ ఇవ్వాల్సి ఉంటుంది కానీ.. వాటిపై ఎలాంటి ఛార్జీలు విధించకూడదని కమిషన్ హెచ్చరించింది. ఐకియా లోగో ఉన్న క్యారీ బ్యాగ్‌కు డబ్బులు వసూలు చేసినందుకు గానూ.. ఐకియాకు కమిషన్ ఫైన్ కూడా వేసింది.

కస్టమర్‌కు ఐకియా స్టోర్ వెయ్యి రూపాయల నష్టపరిహారం చెల్లించాలని కమిషన్ ఆదేశించింది. అంతేకాదు. వినియోగదారుల రక్షణ చట్టంపై అవగాహన కల్పించేందుకు కన్స్యూమర్ లీగల్ ఎయిడ్ అకౌంట్‌లో ఐకియా స్టోర్‌.. 5 వేల రూపాయలు డిపాజిట్ చేయాలని కమిషన్ కోరింది. ఏప్రిల్ 8 నుంచి 45 రోజులలోపు వినియోగదారునికి వెయ్యి రూపాయల పరిహారం చెల్లించాలని.. లేదంటే 5 వేలపై సంవత్సరానికి 24 శాతం వడ్డీ వేసి జరిమానా చెల్లించాల్సి ఉంటుందని కమిషన్ హెచ్చరించింది.