byసూర్య | Wed, Sep 20, 2023, 07:02 PM

వేతనాల పెంపు, ఖాళీల భర్తీ, నిధుల కేటాయింపు తదితర డిమాండ్లతో అంగన్‌వాడీ టీచర్లు, హెల్పర్లు పోరుబాట పెట్టిన సంగతి తెలిసిందే. ఈ సందర్భంగా ఆదిలాబాద్ జిల్లాలో కలెక్టరేట్ ముట్టడికి అంగన్‌వాడీలు పిలుపునిచ్చారు. దీంతో కలెక్టరేట్ వద్ద ఉద్రిక్తత పరిస్థితులు నెలకొన్నాయి. సీఐటీయూ, ఏఐటీయూసీ నాయకులతో కలిసి అంగన్‌వాడీ కార్యకర్తలు కలెక్టరేట్ మట్టడికి యత్నించారు. వారిని అడ్డుకునేందుకు పోలీసులు భారీ బందోబస్తు ఏర్పాటు చేయడంతో ఇరువర్గాల మధ్య తోపులాట చోటుచేసుకుంది.

అంగన్‌వాడీలను అదుపు చేస్తున్న సమయంలో ఓ మహిళా ఎస్సైని కొందరు జుట్టు పట్టుకుని లాగారు. అక్కడి నుంచి ఆమెను పక్కకు ఈడ్చుకెళ్లారు. దీంతో సదరు ఎస్‌ఐ కింద పడిపోయారు. వెంటనే తేరుకున్న ఆమె జుట్టు ముడివేసుకుని తిరిగి విధులు నిర్వర్తించారు. అంగన్‌వాడీ కార్యకర్తలను పోలీసులు వాహనం ఎక్కించి టూటౌన్ స్టేషన్‌కి తరలించారు. దీంతో అక్కడ కూడా వారు ఆందోళన కొనసాగించారు. న్యాయపరమైన డిమాండ్ల కోసం ఉద్యమిస్తుంటే కేసీఆర్ సర్కార్ తమను అణిచివేయడానికి ప్రయత్నిస్తోందంటూ మండిపడ్డారు.

వేతనాల పెంపుతో పాటు రాష్ట్ర ప్రభుత్వం తీసుకొచ్చిన రిటైర్మెంట్‌ పాలసీని వ్యతిరేకిస్తూ అంగన్‌వాడీలు 10 రోజులుగా విధులు బహిష్కరించారు. ఏళ్ల తరబడి అపరిష్కృతంగా ఉన్న డిమాండ్ల సాధనకు సమ్మెను ఎంచుకున్నారు. తెలంగాణ అంగన్‌వాడీ టీచర్స్‌ అండ్‌ హెల్పర్స్‌ జేఏసీ ఆధ్వర్యంలో రాష్ట్రవ్యాప్తంగా అన్ని మండలకేంద్రాల్లో ఆందోళనలు నిర్వహిస్తున్నారు. సీఐటీయూ, ఏఐటీయూసీ తదితర కార్మిక సంఘాల నాయకులు అంగన్‌ వాడీల ఆందోళనకు మద్దతు తెలిపారు. ఇటీవల ప్రభుత్వం ప్రకటించిన పాలసీలో రిటైర్మెంట్‌ వయస్సును 65 ఏళ్లుగా నిర్ధారించారు. పదవీ విరమణ పొందిన టీచర్‌కు రూ.లక్ష, హెల్పర్‌కు రూ.50వేల చొప్పున ఆర్థికసాయం, ఆసరా పెన్షన్‌ అందించనున్నట్లు ప్రకటించారు. ప్రభుత్వ నిర్ణయంపై అంగన్‌వాడీలు అసంతృప్తి వ్యక్తం చేస్తున్నారు.

కనీస వేతనం రూ.26 వేలుగా నిర్ధారించి, టీచర్లకు రూ.10లక్షలు, హెల్పర్లకు రూ.5లక్షల రిటైర్మెంట్‌ బెనిఫిట్స్‌ చెల్లించాలని డిమాండ్ చేస్తున్నారు. రిటైర్మెంట్‌ నాటికి తీసుకునే వేతనంలో సగం వరకు పెన్షన్‌ ఇవ్వాలని.. వేసవి కాలంలో ప్రభుత్వ పాఠశాలలో సమానంగా సెలవులు వర్తింపజేయాలని కోరుతున్నారు. పదవీ విరమణ వయస్సు 60 ఏళ్లకు కుదించి అంగన్‌వాడీ ఉద్యోగులందరికీ హెల్త్‌కార్డులు, వేతనంతో కూడిన సెలవులు మంజూరు చేయాలని పోరు బాటపట్టారు. ఈఎస్‌ఐ, ఉద్యోగభద్రత కల్పించటంతో పాటు సుప్రీం కోర్టు తీర్పు ప్రకారం గ్యాడ్యూటీ చెల్లించాలి కోరుతున్నారు.