by సూర్య | Tue, Jan 18, 2022, 08:07 PM

హిమాలయాల పేర్లు వాటి ప్రత్యేకతలు మనం వినేఉంటాం. కానీ అక్కడ వ్యాధుల నివారణ ఔషదాలు కూడా ఉంటాయటా. హిమం కలిగి ఉన్న ఆలయాలుగా హిమాలయాలకు పేరుంది. అక్కడ ఎన్నో అద్భుతమైన ఔషదాలు, మొండి రోగాలను నయం చేసే మూలికలు లభిస్తాయి కాబట్టి వాటిని ఆలయాలతో పోల్చారు. ప్రస్తుతం ప్రపంచాన్ని వణికిస్తున్న కరోనా మహమ్మారిని నిరోధించే ఫైటోకెమికల్స్ కలిగిన మొక్కను హిమాలయాల్లో తాజాగా గుర్తించారు. ఐఐటీ మండీ (హిమాచల్‌ప్రదేశ్), ఢిల్లీలోని ఇంటర్నేషనల్ సెంటర్ ఫర్ జెనెటిక్ ఇంజినీరింగ్ అండ్ బయో టెక్నాలజీ (ఐసీజీఈబీ) సంయుక్తంగా నిర్వహించిన పరిశోధనల్లో ఈ విషయం వెల్లడయ్యింది. హిమాలయాల్లో అరుదుగా లభించే ‘రోడోడెండ్రాన్ అర్బోరియం’ అనే మొక్క పూరేకుల్లో కొవిడ్-19 చికిత్సలో కీలకమైన ఫైటోకెమికల్స్‌ను గుర్తించారు. ఈ మొక్కను స్థానికంగా ‘బురాన్ష్’గా పిలుస్తారని, దీనిలో ఫైటోకెమికల్స్ కరోనా వైరస్కు వ్యతిరేకంగా పోరాడతాయని తెలిపారు. ఈ అధ్యయన ఫలితాలను ‘బయోమాలిక్యులార్ స్ట్రక్చర్ అండ్ డైనమిక్స్’ జర్నల్లో ఇటీవలే ప్రచురించారు. ఐఐటీ మండీ అసోసియేట్ ప్రొఫెసర్ శ్యామ్కుమార్ మాట్లాడారు. ‘కరోనా వైరస్పై శరీరానికి పోరాడే శక్తిని ఇచ్చే విధానాల్లో వ్యాక్సిన్ ఒకటి.. టీకాయేతర ఔషధాలను గుర్తించేందుకు ప్రపంచవ్యాప్తంగా శాస్త్రవేత్తలు ప్రయత్నాలు సాగిస్తున్నారు.. ఆయా ఔషధాల్లో ఉండే రసాయనాలు మన శరీర కణాల్లోని గ్రహకాలను బంధించి వైరస్ ప్రవేశించకుండా నిరోధిస్తాయి.. శరీరంలోకి వైరస్ ప్రవేశించినా వృద్ధి చెందకుండా అడ్డుకుంటాయి’’ అని అన్నారు. వివిధ చికిత్సలపై అధ్యయనం తర్వాత ఈ మొక్కల రసాయనాలలోని ఫైటోకెమికల్స్.. వైరస్ను నిరోధించడంలో కీలకంగా మారుతున్నాయని గుర్తించామని పేర్కొన్నారు. హిమాలయాల్లో లభించే బురాన్ష్ మొక్కల పూరేకులను స్థానికులు ఎన్నో ఏళ్ల నుంచి వివిధ రకాల చికిత్సల్లో వినియోగిస్తున్నారని శ్యామ్‌ తెలిపారు. ఈ పూరేకుల్లో వివిధ రకాల ఫైటోకెమికల్స్ ఉన్నట్లు శాస్త్రీయంగా పరీక్షించినట్లు వెల్లడించారు. ముఖ్యంగా యాంటీవైరల్ గుణాలపై దృష్టి సారించామని ఆయన వివరించారు. తక్కువ విషపూరిత సమస్యల ఉండే ఈ సహజ మూలం కారణంగా వైరస్ చికిత్సలో ప్రత్యేకించి ఆశాజనకంగా పరిగణించవచ్చు. బహుళ విధానాల ఆధారంగా హిమాలయ వృక్షజాతుల నుంచి మంచి అణువుల కోసం పరిశోధనలు కొనసాగిస్తున్నామని చెప్పారు. ‘‘మేము హిమాలయ మొక్కల నుంచి సేకరించిన ‘రోడోడెండ్రాన్ ఆర్బోరియం రేకుల్లోని ఫైటోకెమికల్స్‌ను ప్రొఫైల్ చేసి పరిశోధించాం.. కోవిడ్ వైరస్‌కు వ్యతిరేకంగా సమర్ధంగా పోరాడుతున్నట్టు గుర్తించాం’’ అని ఐసీజీఈబీ శాస్త్రవేత్త రంజన్ నందా అన్నారు.