by సూర్య | Sun, Jan 16, 2022, 08:37 PM

కోడిపందేలు జూదం కాదు.. మన సంస్కృతిలో భాగం’ అని మంత్రి రంగనాథరాజు వ్యాఖ్యానించారు. ఆంధ్రప్రదేశ్‌లో ఎక్కడ చూసినా ‘సంక్రాంతి’ పండుగ వాతావరణం నెలకొంది. పల్లెలన్నీ పండుగ కళను సంతరించుకున్నాయి. ముఖ్యంగా గోదావరి జిల్లాలు పచ్చగా కళకళలాడుతున్నాయి. ఎప్పటి మాదిరిగానే ఏపీలో జోరుగా కోడి పందేలు ఆడుతన్నారు. కోడి పందేల ద్వారా కోట్లాది రూపాయిలు చేతులు మారుతున్నాయి. ఓవైపు కోర్టులు కోడి పందేలపై నిషేధం విధిస్తున్నాయి. కోడి పందేలు నిర్వహించే వారిపై చర్యలు తీసుకోవాలని గట్టిగా ఆదేశాలు జారీ చేస్తున్నాయి. పోలీసులు సైతం కొన్ని చోట్ల దాడులు చేసి కోడి పందేలు ఆడేవారిని అదుపులోకి తీసుకుంటున్నారు. చట్టప్రకారం కోడి పందేల నిర్వహణకు ఎట్టిపరిస్థితుల్లోనూ అనుమతి లేదు. ఈ క్రమంలోనే కోడి పందేలపై ఆంధ్రప్రదేశ్ హౌసింగ్ శాఖ మంత్రి రంగనాథరాజు కీలక వ్యాఖ్యలు చేశారు. ‘కోడిపందేలు జూదం కాదు.. మన సంస్కృతిలో భాగం’ అని మంత్రి రంగనాథరాజు వ్యాఖ్యానించారు. ఈ మేరకు ఆదివారం రాష్ట్ర ప్రజలందరికీ మంత్రి కనుమ పండుగ శుభకాంక్షలు తెలిపారు. ఈ సందర్భంగా మంత్రి రంగనాథరాజు మీడియాతో మాట్లాడుతూ.. సంస్కృతి, చట్టాలను రెండింటిని గౌరవించాలని, కోడి పందేలు సంప్రదాయంగా, చట్టబద్ధంగా జరుగుతున్నాయని వ్యాఖ్యానించారు. ఇక, జగన్ ప్రభుత్వం పేదలకు ఇళ్లు, ఇంటి స్థలాలు కేటాయిస్తోందని, ఇళ్ల నిర్మాణానికి రూ.32 వేల కోట్లు ఖర్చు చేస్తున్నట్లు మంత్రి రంగనాథరాజు వెల్లడించారు. ఓటీఎస్‌ ద్వారా యాజమాన్య హక్కులు అందిస్తున్నామని ఆయన తెలిపారు. చంద్రబాబు ఎన్ని కుట్రలు చేసినా గృహయజ్ఞం ఆగబోదని ఆయన స్పష్టం చేశారు. వైసీపీ ప్రభుత్వం చేస్తున్న అభివృద్ధిని జీర్ణించుకోలేక కొందరు టీడీపీ నేతలు విమర్శలు చేస్తున్నారని దుయ్యబట్టారు. జగన్‌ సర్కార్‌ పథకాలతో రాష్ట్ర ప్రజలు సంతోషంగా ఉన్నారని, వైసీపీ ప్రభుత్వానికి నీరాజనం పడుతున్నారని పేర్కొన్నారు.