by సూర్య | Sat, Oct 23, 2021, 07:36 AM

అల్లుడితో గొడవపడి పుట్టింటికొచ్చిన కూతురు మరో వ్యక్తితో ఎఫైర్ పెట్టుకుందని కన్న తల్లిదండ్రులే ఓ మహిళను హత్య చేశారు. ఈ ఘటన తమిళనాడులోని రామనాథపురం జిల్లాలో జరిగింది.  పరమకుడి సమీపంలోని నాందుపట్టి గ్రామానికి చెందిన తెన్నారాసు, అమృతవల్లి దంపతులకు కౌసల్య అనే కూతురు ఉంది. కౌసల్యకు నాలుగేళ్ల క్రితం వివాహమైంది. పెళ్లయిన కొన్ని నెలలకే భర్తతో కౌసల్యకు మనస్పర్థలు ఏర్పడ్డాయి. దీంతో 4 నెలల క్రితం కౌసల్య పుట్టింటికి వచ్చేసింది. అప్పటి నుంచి తల్లిదండ్రులతో పాటే కలిసి ఉంటోంది. ఈ క్రమంలో కౌసల్య అదే గ్రామంలో ఉంటున్న ఓ యువకుడితో వివాహేతర సంబంధం పెట్టుకుంది. ఈ విషయం కొన్ని రోజులకు ఆమె తల్లిదండ్రులకు తెలిసింది. భర్త దగ్గరకు వెళ్లిపోవాలని, ఇక్కడ ఉండి ఇవేం పనులని కూతురిని మందలించారు. తల్లిదండ్రులతో తరచూ గొడవలు జరుగుతుండడంతో కౌసల్య ఎలుకల మందు తాగి ఆత్మహత్యకు యత్నించింది. ఇరుగుపొరుగు ఆమెను వెంటనే ఆసుపత్రికి తరలించారు. అపస్మారక స్థితిలోకి వెళ్లిపోయిన కౌసల్యకు డాక్టర్లు చికిత్స మొదలుపెట్టేలోపే కౌసల్యను ఆమె తల్లిదండ్రులు బలవంతంగా ఇంటికి తీసుకెళ్లిపోయారు. ఆమెను గొంతు నులిమి చంపేశారు. ఎలుకల మందు తాగడం వల్ల తమ కూతురు చనిపోయిందని నాటకం ఆడారు. పోలీసులకు కూడా ఎలాంటి సమాచారం ఇవ్వలేదు. వెంటనే అంత్యక్రియలు చేశారు. పోలీసులు ఈ ఘటనలో కౌసల్య తల్లిదండ్రులను అరెస్ట్ చేసి వారిపై హత్యా నేరం కింద కేసు నమోదు చేశారు.