by సూర్య | Sat, Jan 09, 2021, 03:50 PM

తమిళనాడులో దారుణం చోటు చేసుకుంది. 19 ఏళ్ల యువతిపై ఆమె కజిన్ అత్యాచారయత్నం చేయబోయాడు. దీంతో అతడి నుంచి ప్రతిఘటించేందుకు ప్రయత్నించింది. ఇంతలో ఆత్మరక్షణకోసం కత్తితో అతడిపై దాడి చేసి హతమార్చింది. అనంతరం పోలీసులకు ఫోన్ చేసి జరిగిన విషయాన్ని వెల్లడించింది. తమిళనాడులో వారం రోజుల క్రితం జరిగిన ఈ ఘటన ఇప్పుడు వెలుగులోకి వచ్చింది. ఈ ఘటన ప్రస్తుతం సామాజిక మాధ్యమాల్లో వైరల్‌గా మారింది. యువతి ధైర్యాన్ని మెచ్చుకుంటూ నెటిజన్లు ప్రశంసలు కురిపిస్తున్నారు.
వివరాల్లోకి వెళ్తే తిరువల్లూర్‌ జిల్లాలోని శోలవరం ప్రాంతానికి చెందిన పందొమిదేళ్ల యువతిని ఆమె కజిన్‌(24) గత కొన్నిరోజులుగా వేధింపులకు గురిచేస్తున్నాడు. ఈ క్రమంలో గత ఆదివారం ఆమె కాలకృత్యాలు తీర్చుకునేందుకు బయటకు వెళ్లింది. అక్కడ మాటువేసిన మృగాడు లైంగిక దాడికి యత్నించాడు. దీంతో ఇద్దరి మధ్య ఘర్షణ వాతావరణం చోటు చేసుకుంది. ఈ క్రమంలో నిందితుడు తెచ్చుకున్న కత్తి కిందపడటంతో దాన్ని తీసుకున్న ఆమె అతడిపై దాడికి దిగింది. దీంతో అతడు మరణించాడు.
అనంతరం పోలీసులకు ఫోన్‌ చేసి సమాచారమిచ్చింది. కేసు నమోదు చేసిన పోలీసులు విచారణ చేపట్టారు. పోలీసులు ఆమెను అభినందించారు. ఆమె చాలా ధైర్యవంతురాలు. నిజాయితీపరురాలు కూడా. వాంగ్మూలం ఇచ్చేటపుడు ఏమాత్రం భయపడలేదు. నిజానికి తను ఫోన్‌ చేయగానే మావాళ్లు షాకయ్యారు. మృతుడు ప్రవర్తనతో విసుగెత్తిన ఆమె కుటుంబ సభ్యులు గతంలోనే అతడిని హెచ్చరించారు. అయినా తన తీరు మార్చుకోలేదు. సెక్షన్‌ 100 కింద కేసు నమోదు చేశాం. ఆత్మరక్షణ కోసం జరిగిన హత్య కాబట్టి ఆమెకు కొన్ని మినహాయింపులు లభిస్తాయి అని పోలీసులు తెలిపారు.