by సూర్య | Thu, Aug 22, 2019, 07:05 PM
వర్షం పడుతున్న వేళ చినుకులు తనను తాకకుండా గొడుగు అడ్డుపెట్టుకొని ఆడుకుంటున్నఓ చిన్నారిపైకి కారు దూసుకెళ్లింది. ఈ ప్రమాదంలో కొద్ది క్షణాలుపాటు కారు కిందే ఉన్న ఆ చిన్నోడు అదృష్టవశాత్తు చిన్నపాటి గాయం కూడా కాకుండా ప్రాణాలతో బయటపడ్డాడు. ఈ సంఘటన సూరత్లో చోటుచేసుకుంది. సూరత్లోని ఓ కాలనీలో వర్షం పడుతుండగా గొడుగుతో బయటకు వచ్చిన పిల్లాడు నడుస్తూ ఉన్నట్టుండి రోడ్డుపై కూర్చొని పారుతున్న వర్షం నీటితో ఆడుకోవడం మొదలుపెట్టాడు. ఆ సమయంలో ఓ వ్యక్తి తన కుటుంబాన్ని కారులో ఎక్కించుకొని రివర్స్ చేస్తూ వెనక్కి వచ్చాడు. పిల్లాడు అక్కడున్న విషయాన్ని గమనించని కారు డ్రైవర్ చిన్నారిపైకి ఎక్కించేశాడు. రివర్స్ చేసిన కారు ముందుకు వెళ్లేందుకు సిద్దమవుతున్న సమయంలో చుట్టుపక్కల ఉన్న వాళ్లు కారు కింద పిల్లాడున్న విషయాన్ని డ్రైవర్కు చెప్పడంతో అతను అప్రమత్తమై కారు ఆపడంతో పిల్లాడి ప్రాణాలు దక్కాయి. సమీపంలో ఉన్న చిన్నారి తల్లి భయంతో పరుగున వచ్చి చిన్నారిని హత్తుకుంది. ఈ ఘటన మొత్తం సమీపంలో ఉన్న సీసీ కెమెరాల్లో రికార్డయ్యింది. ఈ దృశ్యాన్ని సామాజిక మాధ్యమాల్లో పోస్టు చేయగా చూసినవారందరూ ఆశ్చర్యం వ్యక్తం చేస్తూ.. పిల్లాడు మృత్యుంజయుడంటూ వ్యాఖ్యానిస్తున్నారు.
Latest News