byసూర్య | Wed, Sep 25, 2024, 08:43 PM

తెలంగాణ ప్రభుత్వం సింగరేణి కార్మికులకు తీపి కబురు చెప్పింది. బోనస్ డబ్బుల చెల్లింపుకు తేదీ ఫిక్స్ చేసింది. అక్టోబర్ 9న సింగరేణి కార్మికుల అకౌంట్లలో బోనస్ డబ్బులు జమ కానున్నాయి. ఈ మేరకు సింగరేణి ఉన్నతాధికారులు కీలక నిర్ణయం తీసుకున్నారు. తెలంగాణ ప్రభుత్వం సింగరేణి కార్మికులకు ఇటీవల 33 శాతం ప్రకటించింది. సింగరేణి సంస్థ 2023- 24 ఆర్థిక సంవత్సరంలో సాధించిన లాభాలలో 33 శాతం బోనస్ ఇస్తామని చెప్పారు. 2023-24 ఏడాదిలో సింగరేణికి 4,701 కోట్లు లాభం వచ్చింది. అందులో 33 శాతం అంటే మెుత్తం రూ.796 కోట్ల లాభాలు కార్మికుల వాటా బోనస్‌గా చెల్లిస్తామ‌ని ఇటీవ‌ల సీఎం రేవంత్ రెడ్డి, డిప్యూటీ సీఎం మ‌ల్లు భట్టి విక్రమార్క వెల్లడించారు.

ఈ మేర‌కు మంగ‌ళ‌వారం సింగరేణి సంస్థ డైరెక్టర్లు, అన్ని ఏరియాల జీఎంలు, కార్పొరేట్ జీఎంల‌తో సింగ‌రేణి సీఎండీ ఎన్ బ‌ల‌రాం వీడియో కాన్ఫరెన్స్ నిర్వహించారు. దసరాకు మూడ్రోజుల ముందే అంటే అక్టోబర్ 9 కార్మికుల ఖాతాల్లో డబ్బులు జమ చేయాలని నిర్ణయం తీసుకున్నారు. ఈ మేరకు ఆదేశాలు జారీ చేశారు. సింగరేణి చరిత్రలో కార్మికులకు ఇస్తున్న అత్యధిక బోనస్ ఇదే కావటం విశేషం. సింగరేణి సంస్థలో పనిచేస్తున్న సుమారు 42 వేల మంది అధికారులు, కార్మికులకు ఈ లాభాల వాటాను పంపిణీ చేయనున్నారు. గత ఆర్థిక సంవత్సరంలో సింగరేణి కార్మికులు పనిచేసిన పని దినాల సంఖ్యను పరిగణనలోకి తీసుకొని లాభాల వాటాను బోనస్‌గా చెల్లించనున్నారు. సగటున ఒక్కొక్క కార్మికుడి అకౌంట్‌లో సుమారుగా రూ.1.90 లక్షల చొప్పున జమ కానున్నాయి.

ఇక ఈ ఏడాది కాంట్రాక్ట్ కార్మికులకు కూడా బోనస్ చెల్లిస్తామని ప్రభుత్వం ప్రకటించింది. సింగరేణి లాభాల్లో వాటాగా కేవలం శాశ్వత కార్మికుల, ఉద్యోగులకుకు మాత్రమే బోనస్ చెల్లించేవారు. ఈసారి కాంట్రాక్ట్ కార్మికులకు కూడా రూ. 5 వేల చొప్పున బోనస్ ఇవ్వనున్నట్లు డిప్యూటీ సీఎం భట్టి విక్రమార్క వెల్లడించారు. సింగరేణి చరిత్రలో తొలిసారిగా కాంట్రాక్ట్‌ ఉద్యోగులకూ బోనస్‌ ఇస్తున్నామని చెప్పారు. సింగరేణి కార్మికులకు సంతోషంగా బోనస్‌ ప్రకటిస్తున్నట్లు వెల్లడించారు.