byసూర్య | Sun, Sep 22, 2024, 07:19 PM

తెలంగాణలో మరో కొత్త రైల్వే లైన్ త్వరలోనే అందుబాటులోకి రానుంది. కొత్తపల్లి-మనోహరాబాద్ రైల్వే లైన్ పనుల్లో వేగం పెరగనుంది. ఈ మేరకు రైల్వే లైన్ కోసం కేంద్ర ప్రభుత్వం రూ.137 కోట్లు విడుదల చేసింది. కొత్తపల్లి నుంచి వేములవాడ మధ్యలో ట్రాక్ నిర్మాణానికి కావాల్సిన భూసేకరణకు కరీంనగర్ జిల్లా యంత్రాంగం తాజాగా నోటిఫికేషన్ విడుదల చేసింది. ఈ ప్రాజెక్టు 2025 మార్చి నాటికి పూర్తి చేయా లని లక్ష్యం పెట్టుకున్నారు.

కొత్తపల్లి -మనోహరాబాద్ మధ్య సింగిల్ ట్రాక్ బ్రాడ్ గేజ్ రైల్వే లైన్ నిర్మిస్తున్నారు. కరీంనగర్ నుంచి హైదరాబాద్‌కు దూరాన్ని తగ్గించడం మరియు సిద్దిపేట,సిరిసిల్ల వంటి జిల్లాలకు రైల్వే కనెక్టివిటీని అందించడం ఈ లైన్ ఉద్దేశ్యం. 2024లో కేంద్ర బడ్జెట్‌లో ఈ ప్రాజెక్టుకు 350 కోట్లు కేటాయించారు. కొమురవెల్లి మల్లన్న ఆలయానికి సులువుగా చేరుకోవడానికి వీలుగా కొమురవెల్లి రైల్వే స్టేషన్‌కు శంకుస్థాపన చేశారు. ఈ రైల్వే లైన్‌లో మెుత్తం 16 స్టేషన్లు ఉండనున్నాయి. ఇప్పటికే నాచారం నుంచి సిద్ధిపేట వరకు ట్రయల్ రన్ పూర్తయింది.

ఇక హైదరాబాద్‌లో నాలుగో రైల్వే స్టేషన్ అందుబాటులోకి రానుంది. నగరానికి నాలుగో రైల్వేస్టేషన్‌గా చర్లపల్లి స్టేషన్ సిద్ధమైంది. మొత్తం 5 ప్లాట్‌ఫాంలతో పాటు.. ట్రైన్ల నిర్వహణకు ఏర్పాట్లు పూర్తి చేశారు. స్టేషన్‌ భవనంలోనే టిక్కెట్‌ కౌంటర్లు, కార్యాలయం సిద్ధం చేశారు. స్టేషన్‌కు ఇరువైపులా రాకపోకలు సాగించేందుకు వీలుగా ప్రస్తుతం రహదారుల నిర్మాణం జరుగుతోంది. ఈ స్టేషన్ నుంచి తొలుత 6 ఎక్స్‌ప్రెస్‌ ట్రైన్లు నడపనుండగా.. ఆ తర్వాత 25 జతల దూరప్రాంత ట్రైన్లను నడిపేందుకు సిద్ధమయ్యారు.

రూ.430 కోట్లకు పైగా వెచ్చించి ఈ రైల్వేస్టేషన్‌ను తీర్చిదిద్దుతుండగా.. 24 రైల్వే బోగీలు పట్టే విధంగా ఇప్పటికే 5 ప్లాట్‌ఫాంలు అందుబాటులోకి వచ్చాయి. మరో 4 ఎత్తయిన ప్లాట్‌ఫామ్‌లు అందుబాటులోకి రానున్నాయి. 12 మీటర్ల వెడల్పుతో ఫుట్ ఓవర్ బ్రిడ్జిలు రానున్నాయి. 6 మీటర్ల వెడల్పుతో మరొకటి కూడా సిద్ధం అవుతోంది. 9 ప్లాట్‌ఫాంలలో మొత్తం 7 లిఫ్టులు, 6 ఎస్కలేటర్లను రైల్వే అధికారులు ఏర్పాటు చేశారు. కోచ్‌ నిర్వహణ వ్యవస్థతో పాటు.. ఎంఎంటీఎస్‌ ట్రైన్లకు ఎటువంటి ఆటంకం లేకుండా మరో రెండు ప్లాట్‌ఫాంలు అందుబాటులోకి రానున్నాయి.