byసూర్య | Wed, Sep 18, 2024, 10:02 PM

తెలంగాణలో కొత్త రేషన్ కార్డులు జారీ చేయనున్నట్లు ప్రభుత్వం ప్రకటించిన సంగతి తెలిసిందే. రేషన్ కార్డుల కోసం చాలా కాలంగా ప్రజలు ఎదురు చూస్తుండగా.. అక్టోబర్ నుంచి రేషన్ కార్డులకు దరఖాస్తులు స్వీకరించాలని తాజాగా కేబినెట్ సబ్ కమిటీ నిర్ణయించింది. కొత్తగా 15 లక్షల రేషన్ కార్డులు జారీ చేసేందుకు ప్రభుత్వం సిద్ధమైనట్లు సమాచారం. అయితే కొత్త రేషన్ కార్డుల దరఖాస్తులకు వార్షికాదాయం గ్రామీణ ప్రాంతాల్లో రూ.1.50 లక్షల్లోపు, పట్టణాల్లో రూ.2 లక్షల్లోపు ఉండాలనే నిబంధన ఉంది.

కాగా.. కొత్త రేషన్ కార్డుల జారీకి ఆదాయ పరిమితిపై కాంగ్రెస్ ఎమ్మెల్సీ జీవన్ రెడ్డి తాజాగా సీఎం రేవంత్ రెడ్డికి లేఖ రాశారు. బీపీఎల్‌‌కు దిగువన ఉన్న కుటుంబాలకు ఆదాయ పరిమితిని పట్టణ, గ్రామీణ అనే వ్యత్యాసం లేకుండా తెలంగాణ అంతటా ఒకే విధంగా ఉండాలన్నారు. రాష్ట్రమంతా రూ.2 లక్షలుగా నిర్ధారించాలని విజ్ఞప్తి చేశారు. రేషన్‌ కార్డులను ఇక నుంచి నిరంతర ప్రక్రియగా జారీ చేయాలని కోరారు. ప్రస్తుతం బీపీఎల్‌ కుటుంబాలకు ఆదాయ పరిమితి గ్రామాల్లో రూ.1.5 లక్షలు, పట్టణ ప్రాంతాల్లో రూ.2 లక్షలుగా ఉందని చెప్పారు.

నిజానికి పట్టణాలతో పోలిస్తే.. గ్రామీణ ప్రాంతల్లోనే నిత్యవసర సరుకులు దాదాపు 10 శాతం అధికంగా ఉంటున్నాయని అన్నారు. వీటిని దృష్టిలో ఉంచుకొని తెలంగాణ అంతటా బీపీఎల్‌ ఆదాయ పరిమితి నిర్ధారణ ఒకే విధంగా ఉండేలా రూ.2 లక్షలుగా నిర్ధారించాలని కోరారు. బీపీఎల్‌ రైతులకు సంబంధించి.. నీటిపారుదల సదుపాయం ఉన్న భూములకు ప్రస్తుతం ఉన్న 3 ఎకరాల స్థానంలో 5 ఎకరాలుగా నిర్ధారించాలని సీఎం రేవంత్ రెడ్డికి రాసిన లేఖలో జీవన్ రెడ్డి కోరారు.

కాగా, ప్రస్తుతం తెలంగాణలో 89.96 లక్షల రేషన్‌ కార్డులు ఉండగా.. తాజాగా కొత్త రేషన్‌ కార్డులు, హెల్త్‌ కార్డులు విడివిడిగా అందజేయనున్నారు. ఈ మేరకు మంత్రుల సబ్ కమిటీ వివరాలు వెల్లడించింది. రాష్ట్రంలో అర్హులైన ప్రతి కుటుంబానికి కొత్తగా రేషన్‌ కార్డులు, హెల్త్‌కార్డులు అందజేయనున్నట్లు చెప్పారు. కొత్త రేషన్‌ కార్డుల జారీపై తుది ప్రక్రియ నెలాఖరులోగా పూర్తి కానుంది. మరో రెండ్రోజుల్లో (సెప్టెంబర్ 21) కేబినెట్ సబ్ కమిటీ సమావేశం కానుంది. సెప్టెంబర్ నెలాఖరులోగా ప్రభుత్వానికి నివేదిక అందించనున్నారు. అక్టోబర్‌లో అర్హులైన వారికి కొత్త రేషన్ కార్డులు అందిచనున్నారు.