byసూర్య | Sun, May 05, 2024, 08:22 PM
రాజకీయ పార్టీలపై కొందరు విపరీతమైన అభిమానం పెంచుకుంటారు. పార్టీ విధానాలు నచ్చో.. నాయకుల పనితీరును మెచ్చో ప్రత్యేకమైన అభిమానాన్ని చాటుకుంటారు. కొందరైతే మా తాతది ఆ పార్టీ, మా నాన్నది కాడా అదే పార్టీ, నాది కూడా అదే పార్టీ.. మేం మెుదట్నుంచి ఆ పార్టీకి వీరవిధేయులం అని ప్రకటించుకుంటారు. ఓ వయస్సుకు వచ్చాక.. మనకుంటా సొంత ఆలోచనలు, పరిణితి వచ్చే క్రమంలో పొలిటికల్ పార్టీలపై అభిమానం పెంచుకోవటం కామన్.
అయితే ఆడుకునే వయస్సులో ఓ చిన్నారి బీఆర్ఎస్ పార్టీపై అభిమానం పెంచుకుంది. ఎంతలా అంటే.. పక్క పార్టీలకు చెందిన వారని తెలిస్తే ప్రెండిష్ కూడా కట్ చేసుకునేంతలా. అందుకు సంబంధించిన ఓ వీడియా సోషల్ మీడియాలో వైరల్ అవుతోంది. ఆ వీడియో ఆ చిన్నారి.. తన స్నేహితులు మెుత్తం బీఆర్ఎస్ పార్టీకి చెందిన వారే అని చెబుతుంది. ఫస్ట్ క్లాస్లో ఉన్నప్పుడు ఓ ఫ్రెండ్ బీఆర్ఎస్ పార్టీ అని చెబితే ఫ్రెండ్షిప్ చేశానని థర్డ్ క్లాసులో ఆమెది కాంగ్రెస్ పార్టీ అని తెలియగానే వెంటనే కట్ చేశానని చెప్పుకొచ్చింది. తన ఫేవరెట్ మ్యాథ్స్ టీచర్తో పాటు హిందీ, తెలుగు, సైన్స్ టీచర్లు కూడా బీఆర్ఎస్ పార్టీనేనని చెప్పింది.
అంతలా ఆ పార్టీపై ఎందుకు అభిమానం పెంచుకున్నావని వీడియోలో మిగతా కుటుంబసభ్యులు ప్రశ్నించగా.. కేసీఆర్ చాలా మంచి పనులు చేశారని చెప్పుకొచ్చింది. కేసీఆర్ సీఎంగా ఉన్నప్పుడు పేదలకు కరెంట్ ఇచ్చారని.. పంటలకు నీళ్లు, కడుపునిండా పెట్టారని తన స్టైల్లో చెప్పుకొచ్చింది. ప్రస్తుతం రేవంత్ రెడ్డి వచ్చాక ట్యాంకర్లతో పొలాలకు నీళ్లు పెడుతున్నారని.. గతంలో ఇలాంటి మనకు కనపడలేదని చెప్పింది. అంతే కాదండోయ్.. 'రేవంత్ రెడ్డి వచ్చాక స్కూళ్లలో సక్కగ సదువు కూడా చెప్తలేరు' అంటూ నిట్టూర్చింది.
నరేష్ గౌడ్ అనే వ్యక్తి ఆ వీడియోను తన ట్విట్టర్ ఎక్స్ హ్యాండిల్లో పోస్టు చేశారు. 'కేటీఆర్ గారు మా ఇంట్లో ఈ కరుడు గట్టిన BRS వాదితో తట్టుకోలేక పోతున్నాం. ఒక్కసారి అయినా కేసీఆర్ తాతని కేటీఆర్ గారిని కలవాలి అంటుంది. రోజు ఇంట్లో ఇదే గొడవ BRS అయితేనే friendship చేస్తుంది.' అని రాసుకొచ్చారు. ఈ ట్వీట్కు బీఆర్ఎస్ వర్కింగ్ ప్రెసిడెంట్ కేటీఆర్ స్పందించారు. లవ్ సింబల్ యాడ్ చేసి.. ఈ చిన్నారిని కలవాలనుకుంటున్నట్లు చెప్పారు. నెక్స్ట్ జనరేషన్ లీడర్ అంటూ చిన్నారికి కితాబిచ్చారు.