byసూర్య | Thu, May 02, 2024, 07:48 PM

ప్రమాదవశాత్తు చెట్టుకొమ్మ కాలి తొడలో గుచ్చుకొని ఓ యువకుడు తీవ్రంగా గాయపడ్డాడు. ఈ ఘటన జోగులాంబ గద్వాల జిల్లా మానోపాడు మండలం అమరవాయి గ్రామ శివారులో చోటు చేసుకుంది. ఇదే మండలం మద్దూరు గ్రామానికి చెందిన మాలిక్ (28) ట్రాక్టర్ డ్రైవర్‌గా పని చేస్తున్నాడు. రోజు మాదిరిగానే ట్రాక్టర్ తీసుకొని..మానోపాడు వైపు వెళ్తుండగా.. అమరవాయి గ్రామ శివారులో ట్రాక్టర్ బోల్తా పడింది. అయితే పక్కనే ఉన్న ఓ చేట్టు కొమ్మ మాలిక్ తొడలోకి చొచ్చుకెళ్లిపోయింది. ఈ ఘటనలో మాలిక్ తీవ్రంగా గాయపడ్డాడు.

అరగంట పాటు నొప్పితో విలవిల్లాడిపోయాడు. విషయం తెలుసుకున్న పోలీసులు అక్కడకు చేరుకొని గ్రామస్తుల సాయంతో చెట్టు కొమ్మను అటు ఇటు తొలగించారు. చెట్లను నరికే మిషన్ సాయంతో వాటిని తొలగించారు. అనతరం చెట్టుకొమ్మతోనే అతడిని మానోపాడు ప్రభుత్వ ఆసుపత్రికి తరలించారు. పరిస్థితి విషమంగా ఉందని డాక్టర్లు చెప్పటంతో మెరుగైన వైద్యం కోసం నాగర్‌కర్నూల్ ప్రభుత్వ ఆసుపత్రికి తరలించారు. ప్రస్తుతం అతడి ఆరోగ్యం నిలకడగా ఉందని డాక్టర్లు చెప్పారు.