byసూర్య | Mon, Apr 29, 2024, 07:38 PM

తెలంగాణలో లోక్ సభ ఎన్నికల హడావుడి రోజు రోజుకు జోరందుకుంటోంది. ప్రధాన పార్టీలన్ని రంగంలోకి దిగి ముమ్మర ప్రచారం నిర్వహిస్తున్నాయి. ఈ క్రమంలోనే.. 14 ఎంపీ సీట్లే లక్ష్యంగా కాంగ్రెస్ పార్టీ జోరు ప్రచారం నిర్వహిస్తోంది. అసెంబ్లీ ఎన్నికల్లో మాదిరిగానే.. సీఎం రేవంత్ రెడ్డే స్టార్ క్యాంపెయినర్‌గా మారి ప్రచారం నిర్వహిస్తున్నారు. ఈ క్రమంలోనే.. ప్రత్యర్థి పార్టీలపై సంచలన విమర్శలు, ఆరోపణలు చేస్తూనే.. కొన్ని ఇంట్రెస్టింగ్ కామెంట్స్ చేస్తూ.. జనాల్లో ఆసక్తికర చర్చకు తెరలేపుతున్నారు.

ఈ నేపథ్యంలోనే.. భువనగరిలో నిర్వహించిన రోడ్ షోలో ప్రసంగిస్తూ తన తర్వాత సీఎం అయ్యే అన్ని అర్హతలు మంత్రి కోమటిరెడ్డి వెంకట్ రెడ్డి కి ఉన్నాయంటూ ముఖ్యమంత్రికి కావాల్సిన అర్హతలన్ని ఉన్నాయంటూ రేవంత్ రెడ్డి చేసిన వ్యాఖ్యలు రాష్ట్ర రాజకీయాల్లో హాట్ టాపిక్‌గా మారాయి. లోక్ సభ ఎన్నికల అనంతరం తెలంగాణ రాజకీయాల్లో కీలక మార్పులు రాబోతున్నాయంటూ ప్రచారం జరుగుతున్న వేళ రేవంత్ రెడ్డి చేసిన ఈ వ్యాఖ్యలు సర్వత్ర చర్చనీయాంశంగా మారాయి. అసలు రేవంత్ రెడ్డి చేసిన వ్యాఖ్యల వెనుక మతలబు ఏంటీ.. లోక్ సభ ఎన్నికల తర్వాతా తెలంగాణకు కొత్త సీఎం రానున్నాడా అంటూ రకరకాల ప్రశ్నలు ఉత్పన్నమయ్యాయి.

కాగా.. ఈ ప్రశ్నలన్నింటికీ చెక్ పెడుతూ సీఎం రేవంత్ రెడ్డే స్వయంగా క్లారిటీ ఇచ్చారు. ఓ ప్రముఖ మీడియా సంస్థకు ఇచ్చిన ఇంటర్వ్యూలో తాను ఆ వ్యాఖ్యలు ఎందుకు చేశారన్నది వివరించారు. తాను ఆ వ్యాఖ్యలు చేయడానికి ముందు రోజు కోమటిరెడ్డి బ్రదర్స్ ముఖ్యమంత్రికి మస్కా కొడుతున్నారని, మంత్రి పదవి కోసం సీఎం కాళ్లు పట్టుకుంటున్నారంటూ.. మాజీ మంత్రి జగదీశ్వర్ రెడ్డి ఓ స్టేట్‌మెంట్ ఇచ్చారని రేవంత్ రెడ్డి గుర్తు చేశారు. ఆ వ్యాఖ్యలపై స్పందిస్తూ కోమటిరెడ్డి వెంకట్ రెడ్డి.. తెలంగాణ కోసం మంత్రి పదవిని త్యాగం చేయడంతో పాటు ఆమరణ నిరాహారదీక్ష కూడా చేశారంటూ వివరించారు.

ఉమ్మడి ఆంధ్రప్రదేశ్‌లో కూడా మంత్రిగా పని చేసిన అనుభవం కోమటిరెడ్డి వెంకట్ రెడ్డికి ఉందని రేవంత్ రెడ్డి తెలిపారు. ఇన్ని అర్హతలు ఉన్న కోమటిరెడ్డి మస్కా కొట్టాల్సిన అవసరం లేదని.. వారికి అర్హతే లేదు అన్నట్లుగా జగదీశ్వర్ రెడ్డి చేసిన విమర్శలపై తాను కౌంటర్ ఇచ్చానన్నారు. జగదీశ్వర్ రెడ్డి తప్పుడు మాటలు మాట్లాడుతున్నారన్నారు. కేసీఆర్ సారాలో సోడా కలిపి మంత్రి పదవి తెచ్చుకున్నారు కాబట్టే.. అందరిని అలానే అనుకోవడం మంచిది కాదని.. ఈ క్రమంలోనే కోమటిరెడ్డి వెంకట్ రెడ్డికి ఎంత అర్హత ఉందన్న విషయాన్ని తెలియజెప్పాలనుకున్నానని వివరించాను. అయితే.. తన మొత్తం ప్రసంగంలో కోమటిరెడ్డికి సీఎం అర్హత ఉంది అనే మాటలనే మీడియా వాళ్లు పికప్ చేశారని రేవంత్ రెడ్డి వివరించారు.