byసూర్య | Thu, Apr 18, 2024, 07:52 PM

తాను హోంమంత్రిగా పదవీ బాధ్యతలు చేపడితే అవినీతికి పాల్పడిన కేసీఆర్ కుటుంబాన్ని, మాజీ మంత్రి జగదీష్ రెడ్డిని జైలుకు పంపిస్తానని మునుగోడు ఎమ్మెల్యే, భువనగిరి పార్లమెంట్ నియోజకవర్గ ఇంఛార్జ్ కోమటిరెడ్డి రాజగోపాల్ రెడ్డి అన్నారు. మంగళవారం నకిరేకల్‌లో జరిగిన భువనగిరి నియోజకవర్గ కాంగ్రెస్ సన్నాహక సమావేశంలో ఆయన పాల్గొని మాట్లాడారు. బీఆర్ఎస్ పార్టీ అలీబాబా దొంగల ముఠా అని విమర్శించారు. పోరాడి సాధించుకున్న తెలంగాణను కేసీఆర్ అప్పుల పాలు చేశారని.. లక్షల కోట్లు దోచుకొని నాశనం చేశారని మండిపడ్డారు.

ఈ సందర్భంగా తన మంత్రి పదవిపై ఆసక్తికర కామెంట్స్ చేశారు. తన 56 ఏళ్ల జీవితంలో ఏనాడు తాను చేయి చాచి ఆడగలేదన్నారు. తాను హోమంత్రిని కావాలని ప్రజలు బలంగా కోరుకుంటున్నానని చెప్పారు. తాను హోంమంత్రిని కాకూడదని బీఆర్ఎస్ నేతలు కోరుకుంటున్నారని.. తానే కనుక హోంమంత్రి అయితే బీఆర్ఎస్ నేతలను జైలుకు పంపుతానని చెప్పారు. తనకు మంత్రి పదవి రావాలంటే భువనగిరి ఎంపీ స్థానంలో కాంగ్రెస్ పార్టీ నుంచి పోటీ చేస్తున్న చామల కిరణ్ కుమార్ రెడ్డిని భారీ మెజార్టీతో గెలిపించాలని ప్రజల్ని కోరారు. అలా అయితేనే తనకు మంత్రి పదవి వస్తుందన్నారు.

ఇక మునుగోడు ఉప ఎన్నికల్లో తనను ఓడించిన వారందరికీ రిటన్ గిఫ్ట్ ఇచ్చానని కోమటిరెడ్డి తెలిపారు. పార్లమెంట్ఎన్నికల్లో బీఆర్ఎస్‌ను బొంద పెడుతామన్నారు. ఇప్పటికే జైలుకు వెళ్లిన కవిత.. ఈసారి బతుకమ్మ పండుగ అక్కడే జరుపుకొంటారని ఎద్దేవా చేశారు. కాగా, ఇప్పటికే రాజగోపాల్ రెడ్డి సోదరుడు కోమటిరెడ్డి వెంకట్ రెడ్డి జిల్లా నుంచి మంత్రిగా ఉన్నారు. సీనియర్ నేత ఉత్తమ్ కూడా మంత్రిగా ప్రాతినిథ్యం వహిస్తున్నారు. తనకు కూడా మంత్రి పదవి కావాలని సమయం వచ్చినప్పుడల్లా రాజగోపాల్ రెడ్డి తన మనసులోని మాటను బయటపెడుతున్నారు. గతంలోనూ తానే హోంమంత్రిని అని రాజగోపాల్ రెడ్డి ప్రకటించున్నారు కూడా. తాజాగా ఆయన మరోసారి మంత్రి పదవిపై కామెంట్స్ చేశారు.