byసూర్య | Sun, Nov 27, 2022, 12:18 PM

నేరగాళ్ల వలకు అపుడపుడు వీఐపీలు కూడా చిక్కుతుంటారు. ఆ వలలో తాజాగాా జీవితా రాజశేఖర్ కూడా పడ్డారు. హైదరాబాద్ నగరంలో సైబర్ నేరగాళ్ల ఆగడాలు రోజురోజుకీ మితిమీరిపోతున్నాయి. అమాయకులనే కాదు.. ప్రముఖులను కూడా మాయమాటలతో నమ్మించి కుచ్చుటోపీలు పెడుతున్నారు. ఈ సైబర్ నేరగాడు మాత్రం ఏకంగా సినీ నటులకు, ప్రొడ్యూసర్లకే గాలం వేశాడు. ఈ గాలానికి జీవితా రాజశేఖర్ చిక్కుకున్నారు. ఇటీవలే జీవిత రాజశేఖర్ ఇంట్లో జియో నెట్‌వర్క్‌కు సంబంధించిన వైఫైని పెట్టించుకున్నారు. అయితే.. ఆ నెట్‌వర్క్‌ని ఇన్‌స్టాల్ చేసిన వ్యక్తినని చెప్తూ.. ఒక గుర్తు తెలియని వ్యక్తి జీవితకు కాల్ చేశాడు. తమ ఇంట్లో జియో నెట్‌వర్క్ ఇన్‌స్టాలేషన్ చేసింది తానేనని.. ఈ మధ్యే తనకు ప్రమోషన్ కూడా వచ్చినదని చెప్పుకొచ్చాడు. తాను ఇప్పుడు జియో వస్తువులకు సంబంధించి అమ్మకాలు జరుపుతున్నానని.. అవి అమ్మితే తనకు మరో ప్రమోషన్ వస్తుందని జీవిత, రాజశేఖర్‌లతో సెంటిమెంట్ డైలాగులు చెప్పాడు. అందులోనూ పలువురు తెలిసిన వాళ్ల పేర్లు చెప్పి నమ్మించే ప్రయత్నం చేశాడు. ఆ వ్యక్తి చెప్పిన మాటలను పూర్తిగా నమ్మిన జీవితా రాజశేఖర్.. ఎదో ఓ వస్తువు కొని అతని ఎదుగుదలకు తనవంతు సహకారం అందించాలనుకున్నారు. ఆ వ్యవహారమేంటో చూసుకోవాలని తన మేనేజర్లకు చెప్పారు.

ఇక అప్పటి నుంచి జీవిత రాజశేఖర్ మేనేజర్లు సదరు వ్యక్తితో చాటింగ్ చేశారు. ఈ క్రమంలోనే సగం ధరకే జియోకు సంబంధించిన వస్తువులు ఇస్తామంటూ.. వివరాలను మేనేజర్లకు పంపించారు. దానిలో లక్షన్నర రూపాయల విలువ చేసే వస్తువులను మేనేజర్లు సెలెక్ట్ చేసుకున్నారు. అయితే వీటన్నిటికీ సంబంధించి టోకెన్ అమౌంట్ పంపించాలంటూ సైబర్ నేరగాడు తెలిపాడు. ఏమాత్రం ఆలోచించకుండా.. ఆ వ్యక్తి అకౌంట్‌లోకి లక్షన్నర రూపాయలు ట్రాన్స్‌ఫర్ చేశారు. డబ్బులు ట్రాన్స్‌ఫర్ అవటంతోనే.. సదరు వ్యక్తి ఫోను స్విచ్‌ఆఫ్ చేసుకున్నాడు. దీంతో.. మోసపోయానని గ్రహించిన మేనేజర్లు.. జీవితా రాజశేఖర్‌కు విషయం తెలిపారు.

విషయం తెలవగానే.. జీవిత, రాజశేఖర్.. హైదరాబాద్ సీసీఎస్ సైబర్ క్రైమ్ పోలీసులను ఆశ్రయించారు. ఈ మేరకు సైబర్ క్రైమ్ పోలీసులు కేసు నమోదు చేసుకున్నారు. సదరు వ్యక్తి సెల్ ఫోన్ డాటా ఆధారంగా.. విచారించగా నిందితుడు నరేష్‌గా గుర్తించిన పోలీసులు చెన్నైలో ఉన్నట్లుగా తెలుసుకున్నారు. వెంటనే నరేష్‌ను అరెస్టు చేసిన పోలీసులు.. రిమాండ్‌కు తరలించారు. గతంలో కూడా పలువురు ప్రొడ్యూసర్లను, నటీనటులను కూడా ఇదే తరహాలో నిందితుడు నరేష్ మోసం చేసినట్టు తేలింది. బహుమతుల పేరుతోనే కాకుండా అవార్డులు ఇప్పిస్తామని చెప్పి గతంలో కూడా మోసం చేశాడు. చాలామంది ప్రొడ్యూసర్లు నటీనటులు కూడా నరేష్ బుట్టలో పడి లక్షల్లో డబ్బులు కోల్పోయినట్టు గుర్తించారు.