by సూర్య | Wed, Jun 22, 2022, 02:20 PM

మానవత్వం ఎక్కడైనా పరిమళిస్తుంది. అది తన, మాన, ప్రాంతం, కులం, మతం చూడదు. అలాంటి మానవత్వం పరిమళించే ఓ ఘటన ఇది. ఉక్రెయిన్ ల కోసం ఓ రష్యన్ మానవత్వం చాటాడు. ఇది వినేందుకు కాస్త ఆశ్చర్యం కలిగినా ఇది మాత్రం వాస్తవం. రష్యన్ పత్రిక నొవయా గెజెటా ఎడిటర్ ఇన్ చీఫ్ దిమిత్రి మురతోవ్ నోబెల్ బహుమతి విజేత. ఆయనకు 2021లో ఈ ప్రతిష్ఠాత్మక పురస్కారం లభించింది. సొంతదేశంలో భావ వ్యక్తీకరణ స్వేచ్ఛ పరిరక్షణ కోసం ఆయన చేస్తున్న కృషికి గుర్తింపుగా నోబెల్ ఇచ్చారు. అయితే, గత కొన్నినెలలుగా రష్యా జరుపుతున్న దాడుల్లో వందలాది మంది ఉక్రెయిన్ చిన్నారులు శరణార్థులుగా మారి పొరుగుదేశాల్లో తలదాచుకుంటున్నారు. ఆ చిన్నారుల పరిస్థితి పట్ల నోబెల్ విజేత దిమిత్రి మురతోవ్ చలించిపోయారు. ఆ బాలలకు సాయం చేసేందుకు గాను, తన నోబెల్ బహుమతిని వేలం వేసేందుకు ఇచ్చేశారు. 

ఇప్పుడా నోబెల్ పీస్ ప్రైజ్ కు వేలంలో రూ.807 కోట్ల ధర పలికింది. అమెరికా సంస్థ హెరిటేజ్ ఆక్షన్స్ ఈ నోబెల్ శాంతి బహుమతిని వేలం వేసింది. ఈ నోబెల్ అవార్డును వేలంలో దక్కించుకుంది ఎవరో మాత్రం హెరిటేజ్ ఆక్షన్స్ సంస్థ వెల్లడించలేదు. వచ్చిన నిధులను ఉక్రెయిన్ బాల శరణార్థుల కోసం వినియోగించనున్నారు.