by సూర్య | Wed, Jan 19, 2022, 07:25 PM

విమానయాన రంగంపై 5జీ సీ బ్యాండ్ తీవ్ర ప్రభావం చూపనున్నాయని ఆరంగ నిపుణులు ఆందోళన వ్యక్తంచేస్తున్నారు. విమానయాన రంగంపై తీవ్ర ప్రభావం చూపుతాయని పలు సంస్ధలు ఆందోళన వ్యక్తం చేశాయి. అమెరికాలో బుధవారం నుంచి 5జీ సీ బ్యాండ్ సేవలు ప్రారంభం కానుండగా.. విమానాలు ఎక్కడికక్కడ నిలిచిపోతాయని విమానయాన సంస్థలు భయాందోళనకు గురవుతున్నాయి. ఏటీ అండ్‌ టీ, వెరిజోన్ సంస్ధలు సంయుక్తంగా బుధవారం నుంచి అమెరికాలో 5 జీ సేవలను ప్రారంభిస్తున్నాయి. ఇవి ప్రారంభమైన 36 గంటల్లోగా విమానయాన రంగంలో సంక్షోభం ఏర్పడుతుందని అమెరికా పౌర, సరుకు రవాణా విమాన సేవల సంస్ధలు పేర్కోన్నాయి. విమానాల్లో ఉండే సున్నితమైన ఆల్టీమీటర్లను 5 జీ సేవలు ప్రభావితం చేసే అవకాశం ఉందని ఎఫ్ఏఏ హెచ్చరించింది. తక్కువ దృశ్యమానంలో కార్యకలాపాలు సాగించే విమానాలు పూర్తిగా నిలిచిపోతాయని పేర్కోంది. దీని ప్రభావంతో వందలాది విమానాలు నిలిచిపోయి వేలాదిగా ప్రయాణికులు ఎక్కడి కక్కడే చిక్కుకుపోతారని విమానయాన సంస్ధలు పేర్కొన్నాయి. దీనిపై అమెరికన్ ఎయిర్‌లైన్స్, డెల్టా ఎయిర్ లైన్స్, యునైటెడ్ ఎయిర్ లైన్స్, సౌత్‌వెస్ట్ ఎయిర్ లైన్స్, అలస్కా ఎయిర్ వేస్‌తో సహ పలు సంస్ధలు లేఖ రాశాయి. ‘‘మా విమానాలు ఎగరడానికి గ్రౌండ్ క్లియర్ చేయకపోతే, విమానాల్లో ప్రయాణించేవారు ఎక్కడిక్కడే చిక్కుకు పోవాల్సి వస్తుంది’ అని పేర్కొన్నాయి. 5జీ సేవలు ప్రారంభమైతే 1,100కు పైగా విమానాల రాకపోకలు స్తంభించిపోయే అవకాశం ఉందని సంస్థలు సూచిస్తున్నాయి. ‘నిస్సంకోచంగా చెప్పాలంటే దేశం వాణిజ్యం ఆగిపోతుంది’ అని వైట్‌హౌస్ నేషనల్ ఎకనమిక్ కౌన్సిల్ డైరెక్టర్ బ్రియాన్ డీస్, రవాణా కార్యదర్శి పీట్ బుట్టిగీగ్, ఫెడరల్ ఏవియేషన్ అడ్మినిస్ట్రేషన్ (ఎఫ్ఏఏ) చీఫ్ స్టీవ్ డిక్సన్, ఫెడరల్ కమ్యూనికేషన్స్ కమిషన్(FCC) ఛైర్మన్ జెస్సికా రోసెన్‌వోర్సెల్‌లకు రాసిన లేఖలో పేర్కొన్నారు. కాగా, ఈ లేఖపై ప్రభుత్వ సంస్థలు స్పందించాల్సి ఉంది. మరోవైపు, 5జీ సేవలు మొదలైతే బుధవారం నుంచి అమెరికాకు విమాన సర్వీసులను రద్దు చేయాలని పలు అంతర్జాతీయ విమానయాన సంస్థలు భావిస్తున్నాయి. ఈ సమస్యపై ప్రభుత్వంతో సంప్రదింపులు కొనసాగిస్తున్నామని విమాన తయారీ సంస్ధ బోయింగ్ తెలిపింది. చికాగో, న్యూయార్క్, శాన్ ఫ్రాన్సిస్కో సహా అమెరికాలోని పలు నగరాలకు విమాన సర్వీసులను నిలిపివేస్తామని ఎమిరైట్స్ ఎయిర్‌లైన్స్ పేర్కొంది. అటు, జపాన్ ఎయిర్‌లైన్స్ కో అండ్ ఏఎన్ఏ హోల్డింగ్స్ సైతం కొన్ని మార్గాల్లో తమ విమానాలను నిలిపివేస్తామని తెలిపింది. అమెరికాలో 5జీసేవలను ప్రారంభిస్తున్న ఏటీ అండ్‌ టీ, వెరిజోన్ సంస్ధలు 50 విమానాశ్రయాల చుట్టూ ఉన్న బఫర్ జోన్లలో టవర్లు ఏర్పాటు చేయకుండా ఉండేందుకు అంగీకరించాయి. విమానయాన రంగంలో ప్రతిష్టంభనను తొలగించేందుకు తమ సేవలను కొంతకాలం వాయిదా వేసుకునేందుకు కూడా ఆ సంస్ధలు మొదట అంగీకరించాయి.