by సూర్య | Sat, Jan 15, 2022, 04:19 PM

వినియోగదారుడు తన హక్కులను తెలుసుకొంటే ఏ వ్యాపారస్థుడు మోసం చేయలేడు. అలాంటి ఘటనే మన ముందుకు వచ్చింది. తన సినిమా టికెట్ల‌ను రద్దు చేయకపోవడంతో చండీఘర్‌కు చెందిన రవీందర్ సింగ్ కన్జ్యూమర్ ఫోరమ్‌ను ఆశ్రయించాడు. విషయం తెలుసుకున్న ఫోరమ్… ఆన్‌లైన్ మూవీ టికెట్ సంస్థ రూ.5000 చెల్లించాలని ఆదేశించింది. రవీందర్ సింగ్ 2019 డిసెంబర్ 3న తన మొబైల్ ఫోన్‌లోని ఓ ఆన్‌లైన్ మూవీ టిక్కెట్ బుకింగ్ సంస్థ అప్లికేషన్ నుంచి "బాలా" అనే సినిమా కోసం రెండు సినిమా టిక్కెట్లు బుక్ చేశాడు. వాటికోసం క్రెడిట్ కార్డు ద్వారా రూ.636.72 చెల్లించాడు. డిసెంబర్ 5న సినిమా చూద్దామనుకున్న రవీందర్ సింగ్ తన కుమార్తెకు అనారోగ్యం కారణంగా తన అభిప్రాయాన్ని మార్చుకున్నాడు. దాంతో ఆన్‌లైన్ మూవీ టిక్కెట్ బుకింగ్ సంస్థ కస్టమర్ కేర్‌కు ఫోన్ చేసి టిక్కెట్లను రద్దు చేయమని అడిగాడు. అయితే ప్రదర్శనకు కేవలం 20 నిమిషాలే ఉందని టికెట్లు రద్దు చేయడం అవ్వదని చెప్పేశారు. కానీ అప్పటి వరకూ ఉన్న నియమ నిబంధనల ప్రకారం 20 నిమిషాల ముందు వరకు టికెట్లు రద్దు చేయవచ్చు కదా అని రవీందర్ సింగ్ ప్రశ్నించగా .. ఆ నిబంధనను మార్చామని ఇప్పుడు రెండు గంటల ముందు మాత్రమే రద్దు చేసుకునే అవకాశం ఉందని కస్టమర్ కేర్ ప్రతినిధులు చెప్పారు. దాంతో రవీందర్ సింగ్ టికెట్లు రద్దు కాలేదు. తన డబ్బులు వెనక్కి రాలేదు. అయితే సినిమా టికెట్‌ను కొనుగోలు చేసిన తేదీలో ఉన్న పాలసీ, నిబంధనలు ప్రకారం 20 నిమిషాల ముందు టికెట్లు రద్దు చేయవచ్చు. ఆ విషయాన్ని కన్జ్యూమర్ ఫోరమ్‌కు రవీందర్ సింగ్ వెల్లడించాడు. వినియోగదారు వాదనతో ఫోరమ్ ఏకీభవించింది. దాంతో ఆన్‌లైన్ మూవీ టిక్కెట్ బుకింగ్ సంస్థ రవికి రూ.5000 చెల్లించాలని ఫోరమ్ ఆదేశించింది.