byసూర్య | Tue, Oct 29, 2024, 08:22 PM

ఎన్నికల్లో ఇచ్చిన హామీలన్ని నెరవేర్చే వరకు సీఎం రేవంత్‌ రెడ్డిని వదిలిపెట్టేది లేదంటూ మాజీ మంత్రి హరీష్‌ రావు హెచ్చరించారు. రాష్ట్రంలో కొత్త పథకాల మాట దేవుడెరుగు.. ఉన్న పాత పథకాలను కూడా మూలకేశారంటూ తీవ్ర స్థాయిలో మండిపడ్డారు. రాష్ట్రంలో సగం మంది రైతులకు ఇప్పటికీ రుణమాఫీ జరగలేదని హరీష్ రావు ఆరోపించారు. రకరకాల కొర్రీలు పెట్టి రుణమాఫీకి ఎగనామం పెడుతున్నారంటూ ఆగ్రహం వ్యక్తం చేశారు. దేవుళ్ల మీద ఒట్టు పెట్టిన పాలకుడు.. ఇచ్చిన మాట తప్పితే రాష్ట్రానికే అరిష్టం అని హరీష్ రావు వ్యాఖ్యానించారు.

హామీలు మొత్తం నెరవేర్చేవరకు ఎనుముల రేవంత్‌ రెడ్డి కాదు.. ఎగవేతల రేవంత్‌ రెడ్డి అనే పిలుస్తామంటూ హరీష్ రావు చెప్పుకొచ్చారు. ఢిల్లీకి మూటలు పంపేందుకు.. లక్షా 50 వేల కోట్లతో మూసీ సుందరీకరణకు డబ్బులిచ్చే ముఖ్యమంత్రికి రైతులకు రైతుభరోసా ఇచ్చేందుకు నిధులు లేవా అంటూ ప్రశ్నించారు. రైతుబంధు ఇవ్వని కాంగ్రెస్‌ను ఉరికించాలంటూ కీలక వ్యాఖ్యలు చేశారు. పత్తి రైతులకు మద్దతు ధర లేక రైతులు అవస్థలు పడుతున్నారన్నారు. డెడ్ లైన్లు మారాయి.. పత్రికల్లో హెడ్ లైన్లు మారాయి.. కాని రైతు రుణమాఫీ మాత్రం ఓ లైన్‌కు రాలేదంటూ తనదైన శైలిలో ప్రభుత్వానికి హరీష్‌ రావు చురకలంటించారు.

సర్కార్ దవాఖానాల్లో మందులు కూడా లేవని హరీష్ రావు చెప్పుకొచ్చారు. జీవో 29తో నిరుపేద నిరుద్యోగులకు తీవ్ర నష్టం కలుగుతోందని తెలిపారు. రాష్ట్రంలో ప్రజాపాలన కాదు.. పోలీసు పాలన సాగుతోందన్నారు. సీఎం రేవంత్ రెడ్డికి పాలన మీద ఏమాత్రం పట్టు లేదని దుయ్యబట్టారు. ఫీజు రీయింబర్స్‌మెంట్‌ డబ్బులు రాకపోవటంతో విద్యార్థులు తీవ్ర ఇబ్బందులు పడుతున్నారని ఆవేదన వ్యక్తం చేశారు. బీఆర్ఎస్ పోరాటంతోనే కరెంట్ బిల్లులు పెరగలేదని చెప్పుకొచ్చారు.

వచ్చే అసెంబ్లీలో ప్రభుత్వం మెడలు వంచుతామని హరీష్ రావు చెప్పుకొచ్చారు. అక్రమ కేసులు పెడుతూ.. కొందరు పోలీసులు అతిగా వ్యవహరిస్తున్నారని మండిపడ్డారు. అతి చేస్తున్న పోలీసుల పేర్లు డైరీల్లో రాసిపెడుతున్నామని హరీష్ రావు చెప్పుకొచ్చారు. స్థానిక సంస్థల ఎన్నికల్లో కాంగ్రెస్‌కు బుద్ధి చెప్పాలంటూ హరీష్‌ రావు పిలుపునిచ్చారు.