byసూర్య | Tue, Oct 15, 2024, 07:22 PM

రాజన్న సిరిసిల్ల జిల్లా వేములవాడలోని శ్రీరాజరాజేశ్వరస్వామి ఆలయానికి మహర్దశ పట్టనుంది. ఈ మేరకు దేవాదాయశాఖ మంత్రి కొండ సురేఖ కీలక ప్రకటన చేశారు. యాదాద్రి తరహాలో ఆలయానికి కొత్తరూపు ఇవ్వనున్నట్లు చెప్పారు. ఆలయానికి 65 కిలోల బంగారం, 5 వేల కిలోల వెండి అందుబాటులో ఉందని.. బంగారం, వెండి ఉపయోగించి వేములవాడ ఆలయానికి బంగారు తాపడం, ఉత్సవ విగ్రహాలు, వెండితో పల్లకీలు రూపొందించేందుకు ప్రభుత్వం ప్రణాళికలు రచిస్తున్నట్లు చెప్పారు.

యాదాద్రి లక్ష్మీ నరసింహ ఆలయానికి 63 కిలోల బంగారంతో తాపడం ఏర్పాటు చేయాలని ఇప్పటికే తమ ప్రభుత్వం ఉత్తర్వులు జారీ చేసిందని వెల్లడించారు. సోమవారం (అక్టోబర్ 14) తన మనవడి పుట్టు వెంట్రుకల సందర్భంగా కుటుంబ సమేతంగా మంత్రి కొండా సురేఖ కొండా మురళి దంపతులు రాజన్న ఆలయానికి వచ్చారు. స్వామివారిని దర్శించుకుని కోడె మొక్కులు చెల్లించుకున్నారు. అనంతరం మీడియాతో మాట్లాడిన కొండా సురేఖ.. యాదాద్రి ఆలయం తరహాలో వేములవాడను కూడా ఆధ్యాత్మికంగా అభివృద్ధి చేయాలని తమ ప్రభుత్వం టార్గెట్‌గా పెట్టుకుందని చెప్పారు. ముఖ్యమంత్రి రేవంత్ రెడ్డి సైతం ఈ అంశంపై ప్రత్యేక దృష్టి సారించారని అన్నారు.

వేములవాడ ఆలయ అభివృద్ధిపై త్వరలోనే సీఎం రేవంత్ సమక్షంలో సమావేశం జరుగుతుందని మంత్రి కొండా సురేఖ వెల్లడించారు. ఆ సమీక్షలో ఆలయ అభివృద్ధిపై కీలక నిర్ణయాలు ఉంటాయని చెప్పారు. ఆలయానికి బంగారు తాపడం చేయటంపై సమీక్షలో నిర్ణయం తీసుకుంటామని అన్నారు. అంతకు ముందు ఆలయ అర్చకులు పూర్ణకుంభంతో మంత్రి సురేఖకు స్వాగతం పలికారు. వేములవాడలో పూజల అనంతరం బద్ది పోచమ్మను దర్శించుకున్న కొండా సురేఖ కుటుంబ సభ్యులు బోనాల మొక్కు చెల్లించుకున్నారు.

కాగా మధ్యాహ్నం 3 గంటలకు వేములవాడ రాజన్నకు నివేదన సమర్పించాల్సి ఉంది. అయితే ఆ సమయంలో మంత్రి రాజన్నకు ప్రత్యేక పూజలు చేయడం వల్ల వీలు కాలేదు. దీంతో మంత్రి సురేఖ పూజలు చేసిన అనంతరం 3.30 గంటల సమయంలో అర్చకులు నివేదన సమర్పించారు. దీనిపై విమర్శలు వస్తున్నాయి.