byసూర్య | Sun, Sep 22, 2024, 07:57 PM

తెలంగాణకు హైదరాబాద్ వాతావరణ కేంద్రం అధికారులు మరోసారి రెయిన్ అలర్ట్ జారీ చేశారు. రాష్ట్రంలో నాలుగైదు రోజుల పాటు తేలికపాటి నుంచి భారీ వర్షాలు కురుస్తాయని చెప్పారు. ఈ మేరకు పలు జిల్లాలకు ఎల్లో అలర్ట్ జారీ చేశారు. బంగాళాఖాతంలో నెలకొన్న ఆవర్తనం ప్రభావంతో దక్షిణ తెలంగాణ జిల్లాల్లో ఎక్కువ వర్షాలు కురుస్తాయన్నారు. ఏపీలోని కోస్తా, రాయలసీమలోనూ భారీ వర్షాలకు అవకాశం ఉందన్నారు. బంగాళాఖాతంలో 23న అల్పపీడనం ఏర్పడుతుందని చెప్పారు.

ఈ రోజు ఉదయం నుంచి మధ్యాహ్నం వరకు ఆకాశం పూర్తిగా మేఘాలు కమ్ముకొని ఉంటాయన్నారు. సాయంత్రం 4 తర్వాత వర్షాలు కురిసే ఛాన్స్ ఉందన్నారు. హైదరాబాద్‌లో ఇవాళ సాయంత్రం నుంచి రాత్రివరకూ మోస్తరు వర్షం కురిసే అవకాశం ఉందన్నారు. నేడు భూపాలపల్లి, ములుగు, భద్రాద్రి కొత్తగూడెం, నాగర్‌ కర్నూల్‌, నల్గొండ, సూర్యాపేట, జనగామ, భువనగిరి, రంగారెడ్డి, సంగారెడ్డి జిల్లాల్లో వర్షాలు కురిసే అవకాశాలు ఉన్నట్లు తెలిపారు. ఈ మేరకు ఆయా జిల్లాలకు ఎల్లో అలర్ట్ జారీ చేశారు.

ఇక గాలుల వేగం చూసినట్లయితే.. బంగాళాఖాతంలో గాలి వేగం 35 నుంచి 45 కిలోమీటర్లుగా ఉంటుందని చెప్పారు. తెలంగాణలో గంటకు 30-40 కి.మీ వేగంతో ఈదురు గాలులు వీచే అవకాశం ఉందని ప్రజలు అప్రమత్తంగా ఉండాలని వాతావరణశాఖ నిపుణులు హెచ్చరించారు. తెలంగాణలో మాగ్జిమం ఉష్ణోగ్రతలు 32 డిగ్రీల సెల్సియస్ కాగా.. రాష్ట్రంలో పగటివేళ తేమ తక్కువగా ఉంటుందని అన్నారు. కొన్ని ప్రాంతాల్లో ఉరుములు, మెరుపులతో వర్షాలు కురుస్తాయన్నారు.

తెలంగాణలోని పలు జిల్లాల్లో శనివారం భారీ వర్షం కురిసింది. ముఖ్యంగా హైదరాబాద్ నగరంలో కుండపోత వర్షం కురిసింది. సాయంత్రం 7 గంటల నుంచి 9 గంటల వరకు కుండపోత వర్షం కురిసింది. భారీ వర్షంతో నగరంలోని రోడ్లు జలమయమయ్యాయి. రోడ్లపై నీరు నిలిచిపోవడంతో వాహనదారులు తీవ్రంగా ఇబ్బంది పడ్డారు. లోతట్టు ప్రాంతాలు జలమయం కావటంతో కాలనీల ప్రజలు ఇబ్బందులు పడ్డారు.

ఉప్పల్, రామంతాపూర్, బోడుప్పల్, పీర్జాదిగూడ, మేడిపల్లి, తార్నాక, ఓయూ క్యాంపస్, లాలాపేట, హబ్సిగూడ, నాచారం, మల్లాపూర్, చిలుకానగర్, కోఠి, అబిడ్స్, బేగంబజార్, నాంపల్లి, బషీర్ బాగ్, ముషీరాబాద్, గాంధీనగర్, జవహర్ నగర్, కవాడిగూడ, దోమలగూడ, భోలక్‌పూర్, చిక్కడపల్లి, బాగ్‌లింగంపల్లి, ఆర్టీసీ క్రాస్ రోడ్స్, అడిక్‌మెట్, రాంనగర్, మాదాపూర్, గచ్చిబౌలి, రాయదుర్గం, కూకట్‌పల్లి, మేడ్చల్, కండ్లకోయ, దుండిగల్, హైదర్ నగర్, నిజాంపేట, ప్రగతి నగర్ తదితర ప్రాంతాల్లో వర్షం కురిసింది. భారీ వర్షాలకు పలు ప్రాంతాల్లో ట్రాఫిక్ జామ్ ఏర్పడింది.