byసూర్య | Sat, Apr 20, 2024, 07:46 PM

తెలంగాణలో రాజకీయాలు రసవత్తరంగా మారాయి. లోక్ సభ ఎన్నికలు సమీపిస్తున్న వేళ.. అధికార, ప్రతిపక్ష పార్టీ నేతలు తీవ్ర స్థాయిలో విమర్శలు, ఆరోపణలు చేసుకుంటున్నారు. ఈ క్రమంలోనే.. బీఆర్ఎస్ పార్టీని వీడి కాంగ్రెస్‌లోకి వెళ్లిన కడియం శ్రీహరిపై, సీఎం రేవంత్ రెడ్డిపై మాజీ మంత్రి ఎర్రబెల్లి దయాకర్ రావు కీలక వ్యాఖ్యలు చేశారు. కడియం శ్రీహరి పార్టీ విడిచి వెళ్లటంతో.. బీఆర్ఎస్‌కు పట్టుకున్న దరిద్రం వదిలిందని ఎర్రబెల్లి అభిప్రాయపడ్డారు.

ఇదే క్రమంలోనే.. వారం రోజుల్లో కడియం శ్రీహరి బండారం మొత్తం బయటపెడతానని ఆసక్తికర వ్యాఖ్యలు చేశారు. సీఎం రేవంత్ రెడ్డి చరిత్ర అంతా తనకు తెలుసని.. ఆయన బండారం కూడా బయటపెడతానంటూ చెప్పుకొచ్చారు. వరంగల్ పార్లమెంట్ ఎన్నికల్లో బీఆర్ఎస్ పార్టీ అభ్యర్థిదే గెలుపని.. తన సర్వేలు ఎప్పుడు తప్పు కాలేదని కీలక వ్యాఖ్యలు చేశారు. దేశంలో ఈసారి కాంగ్రెస్ పార్టీకి ప్రతిపక్ష హోదా కూడా దక్కదని ఎర్రబెల్లి దయాకర్ రావు జోస్యం చెప్పారు.

కాగా.. ఇటీవలే కూతురితో కలిసి కడియం శ్రీహరి బీఆర్ఎస్ పార్టీకి రాజీనామా చేసిన విషయం తెలిసిందే. కడియం కూతురు కావ్యకు వరంగల్ బీఆర్ఎస్ ఎంపీ టికెట్ కేటాయించినప్పటికీ.. బీఆర్ఎస్ పార్టీకి రాజీనామా చేసి పోటీ నుంచి తప్పుకున్నారు. అనంతరం కడియం శ్రీహరి, కడియం కావ్య.. ఇద్దరు కలిసి కాంగ్రెస్ కండువా కప్పుకున్నారు. ఈ క్రమంలోనే.. వరంగల్ కాంగ్రెస్ ఎంపీ టికెట్‌ కడియం కావ్యకు దక్కింది.

పార్టీ టికెట్ ఇచ్చినప్పటికీ.. నమ్మక ద్రోహం చేసి కాంగ్రెస్ పార్టీలో చేరటంతో ఇప్పుడు బీఆర్ఎస్ శ్రేణులు తీవ్ర ఆగ్రహంతో ఉన్నారు. ఎలాగైనా కాంగ్రెస్‌ పార్టీని ఓడించి.. కడియం కుటుంబానికి తగిన బుద్ధి చెప్పాలని చూస్తున్నారు. ఈ క్రమంలోనే.. బీఆర్ఎస్ తరఫున ఉద్యమకారుడు.. డాక్టర్ సుధీర్‌కు గులాబీ బాస్ కేసీఆర్ ఎంపీ టికెట్ ఇచ్చారు. అటు బీజేపీ తరపున ఆరూరి రమేష్ పోటీలో దిగుతుండగా.. బరిలో ఉన్న ముగ్గురు అభ్యర్థులు బీఆర్ఎస్ మూలాలు ఉన్న వాళ్లే కావటం గమనార్హం. దీంతో.. వరంగల్ ఎన్నికలు ఇప్పుడు సర్వత్రా ఆసక్తికరంగా మారాయి.