by సూర్య | Sun, May 22, 2022, 02:46 PM

పిల్లలకు పేర్లు  పెట్టడం  ఓ పెద్ద సవాల్. కానీ ప్రస్తుతం పుట్టిన సందర్భం బట్టి పేర్లు పెట్టేసే నయా ట్రెండ్ మొదలైంది. మొన్నటి లాక్ డౌన్ సమయంలో పుట్టిన పిల్లలకు  కొందరు తల్లిదండ్రులు కరోనా అని, లాక్ డౌన్ అని విచిత్ర పేర్లు  పెట్టారు. తాజాగా ఓ పసిపాపకు పెట్టిన పేరు సోషల్ మీడియాలో పెద్ద చర్చకు దారి తీసింది. అమెరికాలోని డెన్వర్ నుంచి ఒర్లాండో వెళ్తున్న విమానంలో ఓ ప్రయాణికురాలు పండంటి బిడ్డకు జన్మనిచ్చింది. విమానంలో పుట్టిన ఆ పాపకు కుటుంబ సభ్యులు ‘స్కై’ అని నామకరణం చేయడం విశేషం. ఫ్రాంటియర్ ఎయిర్ లైన్స్ విమానం డెన్వర్ నుంచి ఒర్లాండో బయలుదేరింది. అందులో షకేరియా మార్టిన్ అనే నిండు గర్భిణి కూడా ఉన్నారు. విమానం టేకాఫ్ అయిన కాసేపటికే ఆమెకు పురిటి నొప్పులు ప్రారంభమయ్యాయి. విమాన సిబ్బందిలో ఒకరైన డయానా గిరాల్డో వెంటనే స్పందించి నొప్పులతో బాధపడుతున్న షకేరియాను బాత్రూములోకి తీసుకెళ్లగా అందులోనే ఆమె ప్రసవించింది. 

షకేరియా సుఖ ప్రసవానికి సహకరించిన డయానును ప్రయాణికులు, విమానయాన సంస్థ అధికారులు ప్రశంసించారు. మరోవైపు, విమానం గాల్లో ఉండగా జన్మించిన ఆ శిశువుకు కుటుంబ సభ్యులు ‘స్కై’గా నామకరణం చేశారు. ఒర్లాండో విమానాశ్రయ సిబ్బందికి విషయం తెలియజేయడంతో విమానం ల్యాండ్ కాగానే షకేరియా, ఆమె బిడ్డను ఆసుపత్రికి తరలించారు.