by సూర్య | Fri, Mar 22, 2019, 05:13 PM

జంటగా హోటల్‌లో బస చేస్తున్నారా? అయితే, జాగ్రత్త మీ వీడియోలు ఏదో ఒక రోజు పోర్న్ వెబ్‌సైట్లలో ప్రత్యక్షం కావచ్చు. దక్షిణ కొరియాలో వెలుగు చూసిన ఈ షాకింగ్ ఘటన గురించి తెలిస్తే ఇకపై హోటళ్లలో బస చేయాలంటేనే భయం వేస్తుంది. ఎందుకంటే.. అక్కడ సుమారు 30 పైగా హోటళ్లలోని గదుల్లో సీక్రెట్ కెమేరాలు బయటపడ్డాయి. ఆ కెమేరాలతో 1600 మంది అతిథుల ఏకాంత వీడియోలు రికార్డు చేశారు. 

ఇటీవల ఓ జంట తాము హోటల్‌ గదిలో ఉన్న వీడియో ఒకటి పోర్న్ వెబ్‌సైట్లో కనిపించిందని పోలీసులకు ఫిర్యాదు చేశారు. ఇదే విషయంపై దక్షిణ కొరియాలో వివిధ పోలీస్ స్టేషన్లలో కూడా కేసులు నమోదయ్యాయి. ఈ కేసును సవాలుగా తీసుకున్న పోలీసులు హోటళ్లల్లో తనిఖీలు జరిపారు. ఈ సందర్భంగా ఇద్దరు నిందితులను అదుపులోకి తీసుకున్నారు. 

సీక్రెట్ కెమేరాలతో సుమారు 1600 మంది అతిథుల ఏకాంత వీడియోలను రికార్డు చేశామని నిందితులు తెలిపారు. దక్షిణ కొరియాలోని 10 నగరాల్లో 30 హోటళ్లలో ఈ కెమేరాలను ఏర్పాటు చేశామన్నారు. ఎలక్ట్రికల్ సాకెట్లు, హెయిర్‌డ్రయర్ హోల్డర్లు, డిజిటల్ టీవీ బాక్సుల్లో కెమేరాలు పెట్టామని తెలిపారు. అలా రికార్డు చేసిన వీడియోలను వెబ్‌సైట్లలో పోస్ట్ చేస్తున్నామన్నారు. ఆ వెబ్‌సైట్‌కు వేల సంఖ్యలో సభ్యులు ఉన్నారని, వారి నుంచి నెలకు రూ.3,102 వసూలు చేస్తున్నామని తెలిపారు.