by సూర్య | Fri, Jul 26, 2024, 10:04 PM

అన్నవరం సత్యనారాయణ స్వామి ఆలయానికి ఇవాళ టీటీడీ టీమ్ వెళుతోంది. సత్యదేవుని ప్రధాన ఆలయంపైన ఉండే విమాన గోపురానికి బంగారు తాపడం చేయించాలని నిర్ణయం తీసుకున్నారు. ఈ మేరకు తాజాగా మరో కీలక అడుగుపడింది.. బంగారు తాపడానికి సంబంధించిన అంచనాలు సిద్ధం చేసేందుకు టీటీడీ సాంకేతిక బృందం ఇవాళ అన్నవరం వెళుతోంది.

 1991లోనే బంగారు తాపడం చేయించడానికి కాకినాడకు చెందిన సామాజిక కార్యకర్త బి వెంకటరమణమూర్తి ప్రభుత్వానికి రిక్వెస్ట్ చేశారు. అప్పటికి ఆలయ పునర్నిర్మాణం కాకపోవడంతో సాధ్యం కాలేదు. మళ్లీ 2012లో ఆలయ పునర్నిర్మాణం సమయంలో.. అలాగే 2019లో మరోసారి ప్రణాళికలు సిద్ధం చేసినా ఆ దిశగా అడుగులు ముందుకు పడలేదు. గత ఏడాది దేవాదాయశాఖ కమిషనర్‌ ఆదేశాలతో.. బంగారు తాపడానికి సంబంధించి మరోసారి ప్రణాళిక రూపొందించారు.

గతేడాది డిసెంబరులో ఆలయ ఈవో రామచంద్రమోహన్, ఛైర్మన్‌ రోహిత్, ధర్మకర్తల మండలి సభ్యులు చర్చించి బంగారు తాపడం చేయించడంపై నిర్ణయం తీసుకున్నారు. ఈ ఏడాది ఫిబ్రవరిలో అన్నవరం ఆలయంలో.. దేవాదాయశాఖ స్థపతి, దేవస్థానం ఇంజినీరింగ్‌ అధికారుల టీమ్ పరిశీలించి ప్రాథమికంగా ఓ అంచనాకు వచ్చారు. దాదాపు 12.5 కేజీల బంగారం అవసరమవుతుందని.. రూ.7 కోట్లు వ్యయం అవకాశం ఉందని అంచనా వేశారు.

అన్నవరం ఆలయ విమాన గోపురానికి బంగారు తాపడం చేయించేందుకు.. ప్రత్యేకంగా ఓ ఖాతా ద్వారా దాతల నుంచి విరాళాలు స్వీకరించి పనులు చేపట్టాలని నిర్ణయం తీసుకున్నారు. ఈ మేరకు దీనికి సంబంధించి అంచనాలు తయారు చేయాలని దేవాదాయశాఖ కమిషనర్ టీటీడీ అధికారుల బృందంను ఆదేశించారు.ఈ క్రమంలో వారు శుక్రవారం గోపురాన్ని పరిశీలించి ఎంత బంగారం అవసరం? అయ్యే వ్యయం.. పనులు ఎలా చేపట్టాలో దేవస్థానానికి నివేదిక అందజేయనున్నారు. ఈ నివేదికను పరిశీలించి.. పనులు ఎప్పటి నుంచి ప్రారంభించాలో ఓ అంచనాకు వచ్చే అవకాశం ఉంది. మొత్తం మీద అన్నవరం సత్యనారాయణ స్వామి వారి ఆలయ విమాన గోపురానికి బంగారు తాపడం చేయించే దిశగా.. నేటి నుంచి కీలక అడుగులు పడుతున్నాయి.