టీమిండియా వెటరన్‌ క్రికెటర్‌ దినేష్‌ కార్తీక్‌ తర్వలోనే అంతర్జాతీయ క్రికెట్‌కు గుడ్‌బై చెప్పనున్నట్లు జోరుగా వార్తలు వినిపిస్తున్నాయి. తాజాగా కార్తీక్‌ పోస్ట్‌ చేసిన ఓ వీడియోతో ఈ వార్తలకు మరింత బలాన్నిచ్చినట్లైంది. ప్రపంచకప్‌లో ఆడాలన్న తన కలను నెరవేర్చుకోవడంలో సహకరించిన సహచర ఆటగాళ్లు, కోచ్‌లకు, తన అభిమానులకు కార్తీక్‌ కృతజ్ఞతలు తెలుపుతూ ఓ భావోద్వేగ వీడియోను పోస్ట్ చేశాడు. ఇది చూసిన అభిమానులు దినేష్‌ కార్తీక్‌ రిటైర్మెంట్‌ తీసుకుంటున్నాడని భావించి.. ‘ప్లీజ్‌ డీకే.. వద్దు' అంటూ కామెంట్లు చేస్తున్నారు. కొంతమంది నెటిజన్లు మాత్రం అంతర్జాతీయ క్రికెట్‌కు గుడ్ బై చెప్పబోతున్నట్లు డీకే సంకేతాలు ఇచ్చాడని అభిప్రాయపడుతున్నారు.