byసూర్య | Thu, Jan 15, 2026, 07:30 PM

సికింద్రాబాద్ , తిరుపతి నగరాల మధ్య ప్రయాణించే వందే భారత్ ఎక్స్‌ప్రెస్ రైలుకు ప్రయాణికుల నుంచి అనూహ్య స్పందన లభిస్తోంది. కేవలం తక్కువ సమయంలోనే గమ్యస్థానానికి చేరుస్తుండటంతో.. భక్తులు, పర్యాటకులు ఈ రైలులో ప్రయాణించేందుకు మొగ్గు చూపుతున్నారు. పెరిగిన రద్దీని దృష్టిలో ఉంచుకుని రైల్వే శాఖ ఈ రైలు సామర్థ్యాన్ని గణనీయంగా పెంచింది.

బోగీల సంఖ్య పెంపు..

2023 ఏప్రిల్ నెలలో కేవలం 8 బోగీలతో ప్రారంభమైన ఈ రైలు ప్రయాణం, ప్రయాణికుల డిమాండ్ మేరకు అంచెలంచెలుగా విస్తరించింది. మొదట బోగీల సంఖ్యను 16కు పెంచిన అధికారులు.. తాజాగా దానిని 20 బోగీలకు పెంచారు. దీనివల్ల ఒకేసారి 1,440 మంది ప్రయాణికులు ప్రయాణించే అవకాశం కలిగింది. సామర్థ్యం పెరగడమే కాకుండా.. ఈ రైలు రంగును కూడా మార్చడం విశేషం. పాత తెలుపు రంగు స్థానంలో ఇప్పుడు ఆకర్షణీయమైన ఆరెంజ్ రంగులో ఈ రైలు పట్టాల పై పరుగులు తీస్తోంది.

సికింద్రాబాద్ - తిరుపతి మార్గంలో ప్రయాణ సమయం తగ్గడం ఈ రైలు విజయానికి ప్రధాన కారణంగా నిలుస్తోంది. సాధారణ ఎక్స్‌ప్రెస్ రైళ్లతో పోలిస్తే వందే భారత్ సుమారు 8 గంటల లోపే తిరుపతికి చేరుస్తుంది. ఇది సమయాన్ని ఆదా చేయాలనుకునే వారికి గొప్ప వరంగా మారింది. ఈ రైలులో ఆటోమేటిక్ తలుపులు, వైఫై సౌకర్యం, జీపీఎస్ ఆధారిత ప్రయాణ సమాచారం, సిసిటివి కెమెరాలు వంటి భద్రతా ప్రమాణాలు ఉన్నాయి. రైలులోనే నాణ్యమైన ఆహారం అందించే క్యాటరింగ్ సౌకర్యం ఉండటంతో ప్రయాణికులకు బయట ఆహారంపై ఆధారపడాల్సిన అవసరం ఉండదు.

ఈ రైలు సామర్థ్యం పెరగడం వల్ల దక్షిణ మధ్య రైల్వే ఆదాయం కూడా గణనీయంగా పెరిగింది. తిరుమల శ్రీవారి దర్శనానికి వెళ్లే భక్తుల సంఖ్య రోజురోజుకూ పెరుగుతున్న నేపథ్యంలో.. వందే భారత్ వంటి వేగవంతమైన రైళ్లు రవాణా వ్యవస్థకు వెన్నెముకగా నిలుస్తున్నాయి. భవిష్యత్తులో ఈ మార్గంలో మరిన్ని స్టాప్‌లు పెంచాలని లేదా రైలు వేగాన్ని మరింత పెంచేలా పట్టాల ఆధునికీకరణ పనులు చేపట్టాలని రైల్వే శాఖ భావిస్తోంది.

ప్రయాణికుల రద్దీ ఎక్కువగా ఉండే వారాంతాల్లో, పండుగ సమయాల్లో ఈ 20 బోగీల వందే భారత్ ఎక్స్‌ప్రెస్ ఎంతో ప్రయోజనకరంగా మారుతుంది. తక్కువ హాల్ట్‌లు ఎక్కువ వేగంతో ప్రయాణించే ఈ రైలు, మధ్యతరగతి అండ్ ఎగువ మధ్యతరగతి ప్రయాణికులకు విమాన ప్రయాణ అనుభూతిని అందిస్తోంది.