byసూర్య | Tue, May 13, 2025, 12:03 PM

నాగర్ కర్నూల్ జిల్లా కొల్లాపూర్ మార్కెట్ యార్డులో సోమవారం రాత్రి కురిసిన అకాల వర్షంతో వరి ధాన్యం తడిసిపోయింది. ఈ ఘటనపై స్పందించిన ఎక్సైజ్ శాఖ మంత్రి జూపల్లి కృష్ణారావు మంగళవారం మార్కెట్ యార్డును సందర్శించారు. పరిస్థితిని స్వయంగా పరిశీలించిన మంత్రి, అక్కడి వరి ధాన్యం తడిసిన తీరుపై తీవ్ర అసంతృప్తిని వ్యక్తం చేశారు.
ఈ సందర్భంగా మంత్రి మాట్లాడుతూ, అధికారుల నిర్లక్ష్యం వల్ల ధాన్యాన్ని తడవకుండా అవసరమైన ఏర్పాట్లు చేయలేదన్నారు. కొనుగోలు ప్రక్రియలో ఆలస్యం జరిగిందని, దీనివల్ల రైతులకు నష్టం వాటిల్లినట్టు పేర్కొన్నారు. ఈ ఘటనకు బాధ్యుడిగా గుర్తించిన మార్కెట్ యార్డ్ కార్యదర్శి రాములును తక్షణమే సస్పెండ్ చేయాలని మంత్రి ఉన్నతాధికారులకు ఆదేశాలు జారీ చేశారు.
రైతులకు నష్టం కలగకుండా, ధాన్యాన్ని తడవకుండా రక్షించే చర్యలు తీసుకోవాలని సంబంధిత అధికారులను ఆయన ఆదేశించారు. భవిష్యత్తులో ఇలాంటి ఘటనలు పునరావృతం కాకుండా చూడాలని, నిర్లక్ష్యంగా వ్యవహరించే అధికారులపై కఠిన చర్యలు తీసుకుంటామని మంత్రి హెచ్చరించారు.