byసూర్య | Mon, Jan 13, 2025, 07:58 PM

సంక్రాంతి పండుగ అంటే.. రంగురంగుల ముగ్గులు, రకరకాల పిండి వంటలు, గంగిరెద్దులు, హరిదాసులే కాదు.. జోరుగా సాగే కోడి పందేలు కూడా. ఈ కోడి పందాలు ఎక్కువగా ఏపీలో జరరనుండగా.. తెలంగాణ బోర్డర్ జిల్లాలైన ఖమ్మం, భద్రాద్రి జిల్లాల్లోనూ అడపాదడపా ఈ సంస్కృతి కొనసాగుతుంటుంది. సంక్రాంతి పండుగ వేళ.. కోడిపందాలు, పేకాట స్థావరాల ద్వారా.. కొన్ని కోట్ల రూపాయలు చేతులు మారనున్నాయి. అయితే.. కోడి పందాలు, పేకాటకు ఎలాంటి అనుమతులు లేకపోయినా.. పందెం రాయుళ్లు సీక్రెట్‌గా పందాలు నడిపిస్తున్నారు. పోలీసులు ఎన్ని చర్యలు తీసుకుంటున్నా పందెం రాయుళ్లు మాత్రం వెనక్కి తగ్గట్లేదు. పోలీసుల కళ్లుగప్పి కోడిపందాలు నిర్వహిస్తున్న స్థావరాలను కనిపెట్టేందుకు.. ఖమ్మం పోలీసులు సూపర్ ఐడియా వేశారు.

సంక్రాంతి పండుగ నేపథ్యంలో ఖమ్మంలో సీక్రెట్‌గా జరుగుతున్న కోడి పందాలను అరికట్టే దిశగా పోలీసులు చర్యలు చేపట్టారు. జిల్లా సరిహద్దుల్లో సీక్రెట్‌గా నిర్వహిస్తున్న పందాల స్థావరాలను కనిపెట్టేందుకు.. టాస్క్ ఫోర్స్ బృందాలు డ్రోన్ కెమెరాలు వాడుతున్నారు. ఈ ఆపరేషన్ కోసం 3 డ్రోన్ కెమెరాలు వినియోగిస్తున్నట్టు పోలీసులు తెలిపారు. కోడిపందాలను నియంత్రించేందుకు డివిజన్, మండల, గ్రామస్థాయిలో టీంలను ఏర్పాటు చేశామని.. కోడిపందాలు నిలువరించేలా పకడ్బందీగా ప్రణాళికలు రూపొందించామని పోలీసులు తెలిపారు.

ఖమ్మం కమిషనరేట్ పరిధిలో కోడిపందాలు, జూదం జరుగుతున్నాయని సమాచారం అందిన వెంటనే అక్కడకు వెళ్లి తగిన చర్యలు తీసుకునేలా కమిషనర్ ఆదేశించారు. కోడిపందాలు, జూదం నిర్వహణకు తోటలు, భూములు, గెస్ట్ హౌసులు ఇచ్చి ప్రోత్సహించే వారిపై కూడా కేసులు నమోదు చేయాలని ఆదేశించారు. డ్రోన్ కెమెరాల ద్వారా కోడి పందెలు, బెట్టింగ్, పేకాట స్థావరాలను కనిపెట్టి.. దాడులు చేసి కేసులు నమోదు చేస్తామని పోలీసులు హెచ్చరించారు. గతేడాది కూడా కోడి పందాలు నిర్వహించిన వారిని, కోళ్లకు కత్తులు కట్టే వారిని గుర్తించి బైండోవర్ కేసులు నమోదు చేశామని పోలీసులు తెలిపారు. ఇప్పుడు కూడా.. కోడిపందేల నిర్వహణ నిషేధంపై గ్రామాల్లో ప్రజలకు అవగాహన కల్పిస్తున్నామని పోలీసులు తెలిపారు.