byసూర్య | Sat, Nov 02, 2024, 11:24 PM

తెలంగాణలో రాజకీయాలు రోజు రోజుకు రసవత్తరంగా మారుతున్నాయి. నిత్యం ప్రభుత్వంపై విమర్శలు గుప్పించే వాళ్లు కూడా అప్పుడప్పుడు ప్రశంసలు కురిపిస్తూ ప్రజలను ఆశ్చర్యపరుస్తుంటారు. అచ్చంగా అదే జరిగింది తెలంగాణలో కూడా. నిత్యం రేవంత్ రెడ్డి సర్కారు మీద విమర్శలు గుప్పించే కేంద్ర హోం శాఖ సహాయ మంత్రి, ఎంపీ బండి సంజయ్ కుమార్.. తాజాగా ప్రశంసలు కురిపించారు. తెలంగాణలో చాలా రోజులకు ప్రోటోకాల్ కనిపించిందని బండి సంజయ్ చెప్పుకొచ్చారు. పార్టీలకు అతీతంగా నాయకులు, అధికారులు సంతోషంగా ఉన్నారని తెలిపారు. రాబోయే రోజుల్లో కూడా ఇదే పరంపర కొనసాగించాలని కాంగ్రెస్ సర్కారుకు సూచించారు. పగలు పట్టింపుల వల్ల సాదించిందేమీ లేదని బండి సంజయ్ చెప్పుకొచ్చారు.

జగిత్యాల జిల్లా మల్యాల ఎక్స్ రోడ్ నుంచి మేడిపల్లి మండలం కాచారం వరకు రూ.25 కోట్లతో డబుల్ రోడ్డు శంకుస్థాపన కార్యక్రమానికి చొప్పదండి కాంగ్రెస్ ఎమ్మెల్యే మేడిపల్లి సత్యంతో కలిసి.. బండి సంజయ్ పాల్గొన్నారు. ఈ సందర్భంగా మాట్లాడిన బండి సంజయ్.. గత ప్రభుత్వ హయాంలో ఎక్కడ ప్రోటోకాల్ లేదు, ప్రారంభోత్సవాలు లేవని పేర్కొన్నారు. కాంట్రాక్టర్లను బెదిరించడం, కమిషన్లు దండుకోవడం జరిగేవని ఆరోపించారు. గత ప్రభుత్వం అధికారుల మీద ఒత్తిడి తెచ్చిందని విమర్శించారు. ఎన్నికల వరకే రాజకీయాలని... ఆ తర్వాత అందరూ కలిసిమెలసి ముందుకు సాగాల్సిన అవసరం ఉందని బండి సంజయ్ సూచించారు.

నూకపల్లి నుంచి కాచారం వరకు డబుల్ రోడ్డుకు కేంద్ర ప్రభుత్వం నిధులు మంజూరు చేసినట్టు బండి సంజయ్ చెప్పుకొచ్చారు. ఇందుకు రాష్ట్ర ప్రభుత్వం కూడా సహకరించిందని బండి సంజయ్ చెప్పుకొచ్చారు. నిధులు మంజూరు చేసిన ప్రధాన మంత్రి నరేంద్ర మోదీకి, కేంద్ర మంత్రి నితిన్ గడ్కరీకి కృతజ్ఞతలు తెలిపారు. తెలంగాణలో ఎక్కువ నిధులు కరీంనగర్ పార్లమెంట్‌కే కేటాయించారని బండి సంజయ్ చెప్పుకొచ్చారు. భవిష్యత్తులో చొప్పదండి నియోజకవర్గానికి మరిన్ని నిధులు తీసుకొస్తామని బండి సంజయ్ హామీ ఇచ్చారు. నిత్యం కాంగ్రెస్ పార్టీని, రేవంత్ రెడ్డి సర్కారును విమర్శించే బండి సంజయ్.. ప్రొటోకాల్ విషయంలో ఇలా పొడగటం ఇప్పుడు తెలంగాణ రాజకీయ వర్గాల్లో చర్చనీయాంశంగా మారింది.