byసూర్య | Sat, Nov 02, 2024, 09:36 PM

గత నెలలో బంగాళాఖాతంలో ఏర్పడిన మూడు అల్పపీడనాల కారణంగా రెండు తెలుగు రాష్ట్రాల్లో విస్తారంగా వర్షాలు కురిసిన సంగతి తెలిసిందే. పలు జిల్లాల్లో భారీ వర్షాలు కురిశాయి. తాజాగా తెంలగాణలో వర్షాలపై హైదరాబాద్ వాతావరణ కేంద్రం అధికారులు కీలక అప్డేట్ ఇచ్చారు. రాష్ట్రంలో మరో మూడు రోజుల పాటు పలు జిల్లాల్లో వర్షాలు కురుస్తాయని చెప్పారు. ఉరుములు, మెరుపులతో కూడిన తేలికపాటి నుంచి ఓ మోస్తరు వర్షాలు కురిసే అవకాశం ఉందని చెప్పారు. ఈ మేరకు ఆయా జిల్లాలకు అధికారులు ఎల్లో అలర్ట్‌ జారీ చేశారు.

ప్రస్తుతం దక్షిణ ఏపీకి సమీపంలో తీరం వెంబడి నైరుతి బంగాళాఖాతంలో సగటు సముద్రమట్టానికి 1.5 కి.మీ నుంచి 3.1 కి.మీ మధ్య చక్రవాతపు ఆవర్తనం కేంద్రీకృతమైందని చెప్పారు. నేడు నిర్మల్‌, నిజామాబాద్‌, జగిత్యాల, రాజన్న సిరిసిల్ల, కరీంనగర్‌, ఆదిలాబాద్‌, ఆసిఫాబాద్‌, మంచిర్యాల, పెద్దపల్లి, జయశంకర్‌ భూపాలపల్లి, వికారాబాద్‌, సంగారెడ్డి, మెదక్‌, కామారెడ్డి, సిద్దిపేట, హైదరాబాద్‌, మేడ్చల్‌ మల్కాజ్‌గిరి జిల్లాల్లో వర్షాలు కురుస్తాయని చెప్పారు. ఈ మేరకు ఆయా జిల్లాలకు ఎల్లో అలర్ట్ జారీ చేశారు.

నవంబర్ 4 వరకు తెలంగాణలో తేలికపాటి నుంచి ఓ మోస్తారు వర్షాలు పడే అవకాశం ఉందన్నారు. ప్రజలు అప్రమత్తంగా ఉండాలని సూచించారు. ఇక హైదరాబాద్‌లో పొడి వాతావరణం ఉంటుందని.. సాయంత్రానికి వాతావరణం చల్లబడి వర్షాలు కురుసే అవకాశం ఉన్నట్లు పేర్కొన్నారు. ఈ మేరకు నగర ప్రజలకు జీహెచ్‌ఎంసీ అధికారులు హెచ్చరికలు జారీ చేశారు. శుక్రవారం సాయంత్రం హైదరాబాద్ నగరంలోని పలు ప్రాంతాల్లో వర్షం దంచికొట్టింది. దీంతో నగరంలోని అనేక కాలనీలు జలమయమయ్యాయి. రోడ్లపై భారీగా నీరు నిలిచింది.

కొండాపూర్, మూసాపేట్, మెహెదీపట్నం, కేపీహెచ్‌బీ కాలనీ, దుండిగల్, నిజాంపేట్, మేడ్చల్, ఖైరతాబాద్, మలక్ పేట్, మియాపూర్, కండ్లకోయ, జూబ్లీహిల్స్, కూకట్‌పల్లి, చార్మినార్, మల్లంపేట్, బోయిన్‌పల్లి, కృష్ణాపూర్, గండి మైసమ్మ, లింగపల్లి, మాదాపూర్, మణికొండ, హైటెక్ సిటీ, బేగంపేట తదితర ప్రాంతాల్లో వర్షం కురిసింది. లింగపల్లి రైల్వే అండర్ పాస్ వద్ద భారీగా వరద నీరు నిలవటంతో వాహనదారులు ఇబ్బందులు ఎదుర్కొన్నారు. గచ్చిబౌలి-లింగపల్లి రూట్‌లో వచ్చే వాహనాలను నల్లగండ్ల ఫ్లైఓవర్ మీదుగా డైవర్ట్ చేశారు. ఇక వాయవ్య బంగాళాఖాతంలో ఈనెల 5 లేదా 6న మరో అల్పపీడనం ఏర్పడే ఛాన్స్ ఉందని ఐఎండీ హెచ్చరించింది. దీని ప్రభావంతో ఈనెల 7 నుంచి 11 వరకు ఏపీ, తెలంగాణలోని పలు జిల్లాల్లో వర్షాలు కురుస్తాయని వాతావరణ శాఖ తెలిపింది.