byసూర్య | Sun, Sep 29, 2024, 07:25 PM

ప్రముఖ కొరియోగ్రాఫర్ జానీ మాస్టర్, యూట్యూబర్ హర్షసాయిలపై లైంగిక వేంధిపుల కేసులు నమోదు కావటం సంచలనం సృష్టించిన సంగతి తెలిసిందే. వారితో గతంలో సన్నిహితంగా మెలిగినవారే అత్యాచారం ఆరోపణలతో కేసులు పెట్టారు. ప్రస్తుతం జానీ మాస్టర్ పోలీసుల కస్టడీలో ఉండగా.. హర్షసాయి కోసం పోలీసులు వెతుకుతున్నారు. ఇదిలా ఉండగానే మరో యూట్యూబర్, తెలంగాణ ఫోక్ సింగర్‌పై అత్యాచారం కేసు నమోదైంది. జగిత్యాల జిల్లాకు చెందిన ప్రముఖ ఫోక్ సాంగ్ రైటర్, సింగర్, జిల్లా సాంస్కృతిక సారథిలో ఉద్యోగిగా పని చేస్తున్న సుద్దాల మల్లిక్ తేజపై ఓ యువతి రేప్ కేసు పెట్టింది.

గతంలో మల్లిక్‌తో కలిసి నటించటంతో పాటు యూట్యూబ్ ఛానెల్స్‌లో ఫోక్ సింగర్‌గా గుర్తింపు తెచ్చుకున్న సదరు యువతి తనను మోసం చేశాడని పోలీసులను ఆశ్రయించింది. తామిద్దరం కలిసి గతంలో యూట్యూబ్ ఛానెల్ ప్రారంభించామని ఆ తర్వాత.. ఛానెల్ ద్వారా వచ్చే ఆదాయంలో ఎక్కువ మెుత్తంలో డబ్బులు తీసుకోవటంతో పాటు తనను బయటకు పంపించాడని ఫిర్యాదులో పేర్కొంది. తనను ఎమోషనల్ బ్లాక్‌మెయిల్ చేసి పలుసార్లు స్టూడియో గదిలోనే అత్యాచారం చేశాడని ఆరోపించింది. తనకు సంబంధించిన యూట్యూబ్ ఛానల్, ఇన్‌స్టాగ్రామ్ ఐడీల పాస్‌వర్డ్‌లు మార్చి పెళ్లి చేసుకోవాలని వేధింపులకు గురి చేస్తున్నాడని జగిత్యాల పోలీసులకు ఫిర్యాదు చేసింది.

గత ముూడేళ్ల క్రితం తనను శారీరకంగా వాడుకొని ఇబ్బందులకు గురి చేశాడని.. ఈ ఏడాది ఆగస్టులోనూ మరోసారి తనపై బలత్కారం చేయబోయాడని ఆరోపించింది. అతడి బారి నుంచి తప్పించుకొని తాను ఇంటికి వెళ్లినట్లు చెప్పింది. అనంతరం తాను తన అమ్మమ్మ ఇంట్లో ఉండగా.. అక్కడకు వచ్చి నానా రచ్చ చేయటంతో పాటు తన కుటుంబసభ్యులను తీవ్రంగా దూషించాడని ఫిర్యాదులో వెల్లడిచింది. బాధితురాలి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. అయితే వీరిద్దరూ చాలా ఫోక్ సాంగ్స్‌లో కలిసి నటించారు. సోషల్ మీడియాలో గుర్తింపు పొందడమే కాకుండా.. గతంలో అనేక టీవీ షోలలో సైతం కలిసి పాల్గొనటం విశేషం.