byసూర్య | Wed, Jun 07, 2023, 06:10 PM

బెంగళూరులో సాఫ్ట్‌వేర్ ఉద్యోగం చేస్తున్న గోదావరిఖని మేదరి బస్తీకి చెందిన రాజస్థాన్ వ్యాపారి జ్ఞానేశ్వర్ కూతురు ఆకాంక్ష ప్రియుడి చేతిలో హత్యకు గురి కావడం కలకలం రేపుతోంది. ఈ హత్యపై యువతి తండ్రి జ్ఞానేశ్వర్ స్పందించాడు. తన కూతురుది ముమ్మాటికీ హత్యేనని తెలిపాడు. నిర్భయ తరహాలో ఆలస్యం చేయకుండా తన కూతురు హత్యకు కారణమైన నిందితుడిని వెంటనే శిక్షించాలంటూ తండ్రి జ్ఞానేశ్వర్ డిమాండ్ చేశాడు. బెంగళూరు కొడిహళి పోలీసులు ఆకాంక్ష హత్యపై కేసు నమోదు చేసుకుని దర్యాప్తు చేపడుతున్నారు. ఇప్పటికే ప్రియుడు అర్పిత్‌ను పోలీసులు అరెస్ట్ చేశారు.

తొలుత ఆకాంక్ష మృతిని ఆత్మహత్యగా భావించినపన్పటికీ.. పోలీసుల విచారణలో హత్యగా తేలింది. సాఫ్ట్‌వేర్ ఉద్యోగం చేస్తూ బెంగళూరులోని కోడిహళ్లి జీవన్ బీమానగర్‌లోని ఓ అద్దె ఇంట్లో స్నేహితురాలితో కలిసి ఆకాంక్ష నివాసం ఉంటుంది. సోమవారం స్నేహితురాలు బయటకు వెళ్లగా.. వచ్చి చూసేసరికి ఆకాంక్ష ఫ్యాన్‌కు వేలాడుతూ విగతజీవిగా కనిపించింది. స్నేహితురాలి సమాచారంతో పోలీసులు ఘటనా స్థలానికి చేరుకుని పరిశీలించారు. కేసు నమోదు చేసుకుని దర్యాప్తు చేపట్టగా హత్యగా తేలింది.

గతంలో ఆకాంక్ష హైదరాబాద్‌లో జాబ్ చేసింది. ఈ సమయంలో బైజూస్‌లో మేనేజర్‌గా పనిచేసే అర్పిత్‌తో పరిచయం ఏర్పడింది. ఈ పరిచయం కాస్త ప్రేమగా మారింది. దాదాపు గత ఐదేళ్లుగా వీరి ప్రేమాయణం కొనసాగుతోంది. అయితే ఇటీవల ఆకాంక్ష బెంగళూరుకు షిఫ్ట్ అవ్వగా.. ప్రతీ వీకెండ్‌లో ఆమె కోసం అర్పిత్ బెంగళూరుకు వెళ్లి వచ్చేవాడు. అయితే గత కొద్ది రోజులుగా ఇద్దరి మధ్య గొడవలు జరుగుతున్నాయి. ఈ క్రమంలో ఇటీవల అర్పిత్ బెంగళూరు వెళ్లగా.. ఇద్దరి మధ్య మాటామాటా పెరిగింది. దీంతో దిండుతో ఆకాంక్ష ముఖంపై శ్వాస ఆడకుండా చేసి అర్పిత్ హత్య చేసినట్లు తెలుస్తోంది. బెంగళూరు నుంచి ఆకాంక్ష మృతదేహాన్ని గోదావరిఖనికి తీసుకొచ్చారు. ఈరోజు గోదావరిఖనిలో ఆకాంక్ష అంత్యక్రియలు ముగిశాయి.

జ్ఞానేశ్వర్‌కు ముగ్గురు కూతుళ్లు, ఓ కుమారుడు ఉన్నాడు. సోమవారం ప్రియుడి చేతిలో దారుణ హత్యకు గురైన ఆకాంక్ష పెద్ద కూతురుగా తెలుస్తోంది. అయితే గత ఐదేళ్లుగా ఆకాంక్ష, అర్పిత్ మధ్య ప్రేమాయణం సాగుతున్నట్లు తెలుస్తోంది. ఆకాంక్ష ఉంటున్న అపార్ట్‌మెంట్‌లోని సీసీటీవీ ఫుటేజ్ పరిశీలించగా.. ప్రియుడు అర్పిత్ సోమవారం రాత్రి ఆకాంక్ష ఫ్లాట్‌కు వచ్చినట్లుగా పోలీసులు గుర్తించారు. దీంతో ప్రియుడు అర్పిత్ ఆకాంక్షను హత్య చేసి దానిని ఆత్మహత్యగా చిత్రీకరించి అనంతరం అక్కడి నుండి పారిపోయినట్లుగా పోలీసులు గుర్తించారు. అర్పిత్‌పై కేసు నమోదు చేసి అతడిని అరెస్ట్ చేశారు.