byసూర్య | Mon, Jun 05, 2023, 07:48 PM

నిర్మల్‌లో ఆదివారం రోజున సీఎం కేసీఆర్ పర్యటించిన విషయం తెలిసిందే. అయితే.. నిర్మల్ కలెక్టరేట్ ప్రారంభోత్సవం తర్వాత.. ఎల్లంపల్లిలో నిర్వహించిన భారీ బహిరంగ సభలో కేసీఆర్ ప్రసంగించారు. అయితే.. ఇన్ని రోజులు ఛాన్స్ దొరికినప్పుడల్లా తిట్టిన తిట్టు తిట్టకుండా.. దమ్ము కూడా తీసుకోకుండా ప్రసంగం మొత్తం బీజేపీనే విమర్శించే కేసీఆర్.. ఒక్కసారిగా యూటర్న్ తీసుకున్నట్టు కనిపించింది. సుమారు అరగంట సేపు సాగిన ప్రసంగంలో మచ్చుకు కూడా బీజేపీ పేరు గానీ, కేంద్ర ప్రభుత్వం గురించి గానీ.. ప్రస్తావించకపోవటం గమనార్హం. పైగా.. ఎప్పుడు లెక్కకుడా చేయని కాంగ్రెస్‌పై మాత్రం పూర్తిగా ఫోకస్ చేశారు. కాంగ్రెస్‌ను తీసుకుపోయి బంగాళఖాతంలో పడేయాలంటూ ప్రజలకు పిలుపునిచ్చారు. అయితే... దీనిపై కాంగ్రెస్ నేతలు తీవ్ర స్థాయిలో మండిపడుతున్నారు. ఎమ్మెల్సీ జీవన్ రెడ్డి తీవ్ర స్థాయిలో ధ్వజమెత్తారు.

జగిత్యాలలో మాట్లాడిన జీవన్ రెడ్డి.. స్వార్థ ప్రయోజనాలకోసం రాష్ట్ర ప్రయోజనాలను కేసీఆర్ తాకట్టు పెడుతున్నారని ఆరోపించారు. లిక్కర్ స్కాం నుంచి తన కూతురిని కాపాడుకునేందుకు.. మోదీ మెప్పు కోసం కాంగ్రెస్‌ను బంగాళాఖాతంలో కలుపుతానంటూ వ్యాఖ్యానించారని విమర్శించారు. ప్రసంగం మొత్తంలో మచ్చుకు కూడా బీజేపీ పేరు తీయకపోవటంతోనే.. కేసీఆర్ అసలు గుట్టు బయటపడిందంటూ చెప్పుకొచ్చారు. రాజకీయాల్లో పూర్తిగా యూటర్న్ తీసుకుని.. బీజేపీతో కుమ్మక్కయ్యారని ఆరోపించారు. దానికి కారణం తన కూతురు కేసు విషయమేనని జీవన్ రెడ్డి ఆరోపించారు.

మరోవైపు.. కాంగ్రెస్‌ను బంగాళాఖాతంలో పడేయాలన్న వ్యాఖ్యలపై తీవ్ర ఆగ్రహం వ్యక్తం చేసిన జీవన్ రెడ్డి.. కేసీఆర్‌కు పలు ప్రశ్నలు సంధించారు. "తెలంగాణ ప్రజల దశాబ్దాల కల సాకారం చేసినందుకా.. రైతుల ఆత్మహత్యలు నివారించి, వారిలో ఆత్మ స్థైర్యం నింపేందుకు ఉచిత విద్యుత్ ఇవ్వడంతోపాటు, బకాయిలు మాఫీ చేసినందుకా.. ఒకేసారి లక్ష రుణమాఫీ చేసినందుకా.. పంట రుణాలపై వడ్డీ రాయితీ కల్పించినందుకా.. దీర్ఘ కాలిక, స్వల్ప కాలిక రుణాలపై వడ్డీ రాయితీ ఇచ్చినందుకా.. తప్పా, తాలు లేకుండా, కల్లం కాడనే వడ్లు కొనుగోలు చేసి, రైతులకు అండగా నిలిచినందుకా.. నిరుపేదలకు ఉచితంగా వైద్యం అందించేందుకు ఆరోగ్యశ్రీ ప్రవేశ పెట్టినందుకా.. 104,108 సౌకర్యం కల్పించినందుకా.. ఎందుకు కాంగ్రెస్‌ను బంగాళాఖాతంలో వెయ్యాలి" అంటూ సీఎం కేసీఆర్‌ను జీవన్ రెడ్డి నిలదీశారు.