byసూర్య | Wed, Nov 30, 2022, 10:42 PM

రాజకీయాలు, సిద్ధంతాలకు అతీతంగా మహిళలను గౌరవించాల్సిన అవరసం ఉందని తెలంగాణ గవర్నర్ తమిళసై సౌందరరాజన్ పేర్కొన్నారు. వైఎస్సాఆర్‌టీపీ అధ్యక్షురాలు వైఎస్ షర్మిల అరెస్టుపై తెలంగాణ గవర్నర్ తమిళసై సౌందరరాజన్ పై విధంగా స్పందించారు. కారు లోపల ఉన్న షర్మిలను క్రేన్ సాయంతో లాక్కెళ్లిన దృశ్యాలు తనను కలిచివేశాయని గవర్నర్ అన్నారు. షర్మిలను ఆ విధంగా అరెస్టు చేయటాన్ని తప్పుపట్టిన గవర్నర్.. ఆమె ఆరోగ్యం, భద్రత విషయాలపై ఆరా తీశారు.

ఇదిలావుంటే సోమవారం వరంగల్ జిల్లా నర్సంపేటలో ఆమె ప్రజా ప్రస్థాన యాత్ర చేపట్టారు. ఈ సందర్భంగా స్థానిక ఎమ్మెల్యే పెద్ది సుదర్శన్ రెడ్డిపై తీవ్ర వ్యాఖ్యలు చేశారు. దీంతో ఆగ్రహం వ్యక్తం చేసిన టీఆర్ఎస్ శ్రేణులు షర్మిల పాదయాత్రను అడ్డుకున్నారు. షర్మిల గో బ్యాక్ అంటూ ఆమెకు వ్యతిరేకంగా నినాదాలు చేశారు. షర్మిల ప్రచార రథం, ఫ్లెక్సీలకు నిప్పు పెట్టారు. దీంతో తనపై టీఆర్ఎస్ శ్రేణులు చేసిన చేసిన దాడిని నిరసిస్తూ.. ఆమె మంగళవారం ప్రగతిభవన్ ముట్టడికి పిలుపునిచ్చారు. అయితే పోలీసులు ఆమెను అడ్డగించే ప్రయత్నం చేశారు. ఈ క్రమంలోనే ఆమె కారులోనే ఉండి నిరసన వ్యక్తం చేశారు. కారు లోపల ఉన్న షర్మిలను క్రేన్ సాయంతో పంజాగుట్ట నుంచి లాక్కెళ్లి ఎస్ఆర్ నగర్ పోలీస్ స్టేషన్‌లో ఉంచారు. అనంతరం ఆమెపై పలు సెక్షన్ల కింద కేసులు నమోదు చేశారు.

ఎస్సాఆర్ నగర్ పోలీసు స్టేషన్ నుంచి నాంపల్లి కోర్టులో షర్మిలను హాజరు పరిచారు. షర్మిలతో పాటు ఏడుగురిని పంజాగుట్ట పోలీసులు 14 ఏసీ ఎంఎం మెజిస్ట్రేట్ ముందు హాజరుపర్చారు. సుదీర్ఘగా విచారణ అనంతరం కోర్టు.. షర్మిలతో పాటు మరో ఐదుగురిని బెయిల్ మంజూరు చేసింది. కాగా.. షర్మిలను రిమాండ్‌ విధించాలని పోలీసులు కోరగా.. షర్మిల తరఫు న్యాయవాది ఖండించారు. తన క్లయింట్‌పై తప్పుడు కేసులు పెట్టి అరెస్ట్ చేశారని ఆమె తరఫు లాయర్ వాదించారు. శాంతి యుతంగా నిరసన తెలపడానికి వెళ్తే అక్రమంగా అరెస్ట్ చేశారంటూ.. పోలీసుల తీరును తప్పుబట్టారు. గతంలో రాజాసింగ్ రిమాండ్‌ను న్యాయవాది ప్రస్తావించారు. పోలీస్ విధులకు షర్మిల ఎక్కడా కూడా ఆటంకం కలిగింలేదన్నారు.

ఇదిలా ఉంటే.. లా అండ్ ఆర్డర్ సమస్య వచ్చే అవకాశం ఉండటం వల్లే షర్మిలను అదుపులోకి తీసుకున్నామని పోలీసులు తెలిపారు. ముందస్తుగా సహకరించాలి అని కోరినా వినకపోవటం వల్ల.. రోడ్డుపై షర్మిల, పార్టీ కార్యకర్తలతో న్యూసెన్స్ క్రియేటయ్యిందన్నారు. ఈ సమయంలో రిమాండ్ విధించకపోతే లా అండ్ అడర్ సమస్య వచ్చే అవకాశం ఉందని పోలీసులు తెలిపారు. ఇరువైపులా వాదనలు విన్న న్యాయస్థానం వ్యక్తిగత పూచీకత్తుపై బెయిల్ మంజూరు చేసింది. కాగా.. షర్మిలను అరెస్టు చేసిన తీరుపై విమర్శలు వెల్లువెత్తున్నాయి. ఆమె కారులో ఉండగానే క్రేన్ సాయంతో పోలీసు స్టేషన్‌కు తరలించటంపై పలువురు ఆగ్రహం వ్యక్తం చేస్తున్నారు.