byసూర్య | Mon, Jul 04, 2022, 12:11 AM

భాగ్యలక్ష్మీ అమ్మవారి సాక్షిగా చెబుతున్నాం.. తెలంగాణలో కేసీఆర్ గడీలు బద్దలు కొడతాం. కేసీఆర్ గడీల్లో బందీ అయిన తెలంగాణ తల్లిని రక్షించుకునే బాధ్యతను తీసుకుందాం అని తెలంగాణ రాష్ట్ర బీజేపీ చీఫ్ బండి సంజయ్ పిలుపునిచ్చారు. బీజేపీ విజయ సంకల్ప సభకు హాజరైన ప్రజలను చూస్తే ఆనందంగా ఉందన్న బండి సంజయ్ కానీ ప్రధాని మోదీని ఉద్దేశించి టీఆర్ఎస్ నాయకుల వ్యాఖ్యలు చూస్తే బాధగా ఉందన్నారు. కరోనా టీకాలను ఉచితంగా అందించినందుకు మోదీని తిడుతున్నారా, పేద ప్రజలకు ఉచితంగా బియ్యం ఇస్తున్నందుకు తిడుతున్నారా..? ఉక్రెయిన్‌లో యుద్ధాన్ని ఆపి మరీ తెలుగు రాష్ట్రాల విద్యార్థులను కాపాడినందుకు నరేంద్ర మోదీని తిట్టాలా..? అని బండి సంజయ్ ప్రశ్నించారు. మోదీకి స్వాగతం పలకడాన్ని గడీలో బందీ అయిన తెలంగాణ తల్లి పులకించిపోవాలన్నారు.

తెలంగాణలో అనేక సంక్షేమ పథకాలను మోదీ అమలు చేస్తున్నారన్న బండి సంజయ్.. కేంద్రం అనేక నిధులు ఇవ్వడానికి సిద్ధంగా ఉన్నప్పటికీ.. రాష్ట్ర ముఖ్యమంత్రికి అభివృద్ధి మీద ధ్యాస లేదన్నారు. మోదీ సర్కారును విమర్శించి రాజకీయ లబ్ధి పొందడానికి కేసీఆర్ ప్రయత్నిస్తున్నారని ఆరోపించారు. తెలంగాణలో పేదలు ఇబ్బంది పడొద్దని మోదీ అనేక సందర్భాల్లో తనతో చెప్పారన్నారు.

తెలంగాణ రాష్ట్రం బీజేపీది అన్న సంజయ్.. తమ పార్టీ సహకరించడం వల్లే తెలంగాణ ఏర్పాటైందన్నారు. కష్టాల్లో ఉన్న పేదలకు భరోసా కల్పించడం కోసం.. బీజేపీ కార్యకర్తలకు ధైర్యం చెప్పడం కోసం పార్టీ జాతీయ కార్యవర్గ సమావేశాలను హైదరాబాద్‌లో నిర్వహిస్తున్నామన్నారు. డబుల్ ఇంజిన్ సర్కారుకు తెలంగాణ లో అవకాశం ఇవ్వాలని బండి సంజయ్ కోరారు. మరో 20 ఏళ్లపాటు దేశంలో బీజేపీ అధికారంలో ఉంటుందన్న సంజయ్.. కేసీఆర్ సర్కారు ఉద్యోగులకు జీతాలు కూడా ఇవ్వలేని పరిస్థితిలో ఉందన్నారు. తెలంగాణను కాపాడటం కోసం.. రాష్ట్రం అభివృద్ధి చెందడం కోసం నరేంద్ర మోదీ పాలన తెలంగాణలో రావాలన్నారు.

ప్రధాని మోదీని దేవుడిగా అభివర్ణించిన సంజయ్.. ఆయనకు చప్పట్లతో స్వాగతం పలకాలన్నారు. పులి వస్తుందంటే గుంట నక్కలు పారిపోతాయన్న సంజయ్.. ప్రధాని మోదీని పులితో అభివర్ణించారు. ప్రపంచంలో ఎక్కడి వెళ్లినా.. ఈ పులిని స్వాగతిస్తున్నారన్న సంజయ్.. కేసీఆర్ లాంటి మూర్ఖులకు ఆయన విలువ తెలియడం లేదన్నారు.