byసూర్య | Wed, Jan 20, 2021, 05:25 PM

సీఎం కేసీఆర్ తన ఫాంహౌస్ లో తన కుమారుడు కేటీఆర్ ను సీఎం చేయడానికి మూడు రోజుల పాటు దోష నివారణ పూజలు నిర్వహించారని తెలంగాణ బీజేపీ అధ్యక్షుడు బండి సంజయ్ అన్నారు. ఆ పూజా సామగ్రిని త్రివేణి సంగమంలో కలిపేందుకే సీఎం కేసీఆర్ కాళేశ్వరానికి వెళ్లారని అన్నారు. కాళేశ్వరంలో కేసీఆర్ దంపతులు ఏం కలిపారో చెప్పాలని, కాళేశ్వరం ప్రాజెక్టు విషయంలో మూడో టీఎంసీతో వచ్చే లాభమేమిటో సీఎం చెప్పాలని సంజయ్ డిమాండ్ చేశారు.
కేటీఆర్ సీఎం కావాలని తెలంగాణ ఉద్యమ ద్రోహులు మాత్రమే కోరుకుంటున్నారని, కేటీఆర్ సీఎం కావడం నిజమైన ఉద్యమకారులకు ఇష్టం లేదని బండి సంజయ్ అన్నారు. కేటీఆర్ సీఎం అయినా, కాకపోయినా తమకు ఒకటేనని, కేటీఆర్ సీఎం కావడాన్ని ఇష్టపడని టీఆర్ఎస్ ఎమ్మెల్యేలు వస్తే బీజేపీలో చేర్చుకుంటామన్నారు. అయితే వారికి అవినీతి మరకలు ఉండకూడదని అన్నారు. దళితుడిని సీఎం ని చేస్తానని కేసీఆర్ చెప్పారని, ఇప్పటికైనా ఆ పని చేయాలని డిమాండ్ చేశారు. కేసీఆర్ చేసే పూజలన్నీ ఆయన కుటుంబం కోసమేనని, తాము చేసే పూజలు సమాజ హితం కోసమని బండి సంజయ్ అన్నారు. మంత్రి ఈటలకు టీఆర్ఎస్ పార్టీలో అన్యాయం జరిగిందని, ప్రభుత్వానికి ఇబ్బందులు వచ్చినప్పుడల్లా ఈటలను ముందు పెట్టి కేసీఆర్ బయటపడుతున్నారని అన్నారు.