byసూర్య | Mon, Jan 11, 2021, 02:04 PM

నల్గొండ జిల్లాలో రోడ్డు ప్రమాదం సంభవించింది. ఈ ప్రమాదంలో ఓ బాలిక అక్కడికక్కడే మృతి చెందింది. కారు ఢీకొనడంతో 11 ఏళ్ల బాలిక అక్కడికక్కడే మృతి చెందింది వివరాల్లోకి వెళ్తే నల్గొండ జిల్లాలో ఈ విషాదకరమైన ఘటన చోటు చేసుకుంది. ఆదివారం దామరచర్లలో గ్రామానికి చెందిన కొట్ర భవాని(11)లాక్ డౌన్ కారణంగా స్కూల్‌కు వెళ్లడం లేదు. దీంతో ఇంటికి సమీపంలో ఉన్న డ్యాన్సు తరగతులకు వెళ్తోంది. రోజూ డాన్స్ క్లాస్‌కు వెళ్లి వస్తుండేది. ఈ తరుణంలోనే ఆదివారం కూడా డ్యాన్సు క్లాస్ కి హాజరయ్యింది.

ఇంటికి సమీపంలోనే క్లాసులు జరుగుతుండటంతో రోజూ నడుచుకుంటూ వెళ్లేది. అయితే ఆదివారం కూడా క్లాస్‌కు వెళ్లిన భవాని క్లాస్ అయిపోవడంతో తిరిగి ఇంటికి బయల్దేరింది. రోడ్డు దాటుతుండగా ఓ కారు అత్యంత వేగంగా వచ్చి భవాని ఢీకొట్టింది. దీంతో ప్రమాద స్థలంలోనే అక్కడికక్కడే భవాని మృతి చెందింది. ప్రమాదం గురించి తెలుసుకున్న పోలీసులు సంఘటన స్థలానికి చేరుకొని మృతదేహాన్ని పోస్టుమార్టం నిమిత్తం హాస్పిటల్ కి తరలించారు. కేసు నమోదు చేసుకుని దర్యాప్తు చేపట్టారు.డాన్స్ క్లాస్‌కు వెళ్లిన తమ కూతురు విగతజీవిగా మారడంతో తల్లిదండ్రులు కన్నీరు మున్నీరుగా విలపిస్తున్నారు.