byసూర్య | Sat, Jan 09, 2021, 03:26 PM

తన తన కళ్లముందే కొడుకు, కోడలు దూరమవ్వడం చూసి ఆ తండ్రి తట్టుకోలేకపోయాడు. ఎట్టి పరిస్థితుల్లోనైనా ఇద్దరినీ కలపాలని భావించాడు. పోలీసులు అయితే భయపెడతారని భావించి కోడలితో కలిసి పోలీసులకు ఫిర్యాదు చేశాడు. తన తండ్రి తనపై పోలీసులకు ఫిర్యాదు చేయడాన్ని తట్టుకోలేకపోయిన ఆ కొడుకు బలవన్మరణానికి పాల్పడ్డాడు. ఈ షాకింగ్ ఘటన భద్రాద్రి కొత్తగూడెం జిల్లాలో చోటుచేసుకుంది. వివరాల్లోకి వెళ్తే పాల్వంచ మండలం నాగారం గ్రామానికి చెందిన ఐలపాక పవన్ కళ్యాణ్(24)కు సత్తుపల్లికి చెందిన రామకృష్ణవేణితో ఐదేళ్ల క్రితం వివాహమైంది. ఈ దంపతులకు నాలుగేళ్ల కుమార్తె కూడా ఉంది.
అయితే.. పెళ్లైన ఏడాదికే భార్యభర్తల మధ్య మనస్పర్థలు రావడం మొదలయ్యాయి. దీంతో కృష్ణవేణి తన పాపతో కలిసి పుట్టింటికి వెళ్లిపోయింది. గత నెల 14న పవన్ కళ్యాణ్ తల్లి బుల్లెమ్మ(45) గుండెపోటుతో మరణించడంతో.. అంత్యక్రియలకు హాజరైంది. అప్పుడు భర్తతో కలిసి జీవిద్దామని నచ్చచెప్పే ప్రయత్నం చేసింది. అయితే అతడు వినకపోవడంతో మామ శ్రీను సహాయం కోరింది. కొడుకు, కోడలు కలిసి ఉంటే బాగుంటుందని అతను కూడా భావించాడు. కోడలికి మద్దతుగా కొడుకుపై పోలీసులకు ఫిర్యాదు చేశాడు.
పోలీసులు జోక్యం చేసుకుంటే అయినా.. కొడుకు మారి కోడలిని ఇంటికి తీసుకువస్తాడని భావించాడు. కానీ తండ్రి అలా తనపై పోలీసులకు ఫిర్యాదు చేయడం పట్ల పవన్ తీవ్ర మనస్థాపానికి గురయ్యాడు. ఇంట్లో ఎవరూ లేని సమయంలో ఆత్మహత్య చేసుకున్నాడు. తన శవాన్ని తన తండ్రి ముట్టుకోవడానికి వీల్లేదంటూ సూసైడ్ నోట్ లో పేర్కొన్నాడు. అయితే కేసు నమోదు చేసిన పోలీసులు దర్యాప్తు చేస్తున్నారు.