by సూర్య | Tue, Feb 18, 2025, 11:42 AM

ఈ యేడాది బాలీవుడ్ కు జనవరి మాసం ఓ రకంగా దెబ్బేసింది. కాస్తంత అంచనాలు ఉన్న స్టార్ హీరోల చిత్రాలు బాక్సాఫీస్ బరిలో చేతులెత్తేశాయి. సోనూసూద్ 'ఫతే' , అక్షయ్ కుమార్ 'స్కై ఫోర్స్', కంగనా రనౌత్ 'ఎమర్జెన్సీ'  చిత్రాలు ఫర్వాలేదనిపించాయి కానీ గొప్ప విజయాన్ని మాత్రం అందుకోలేకపోయాయి. ఇక షాహిద్ కపూర్ 'దేవా'  అయితే బాక్సాఫీస్ దగ్గర ఘోర పరాజయాన్ని మూటకట్టుకుంది. ఇది 2013లో వచ్చిన మలయాళ చిత్రం 'ముంబై పోలీస్'కు ఇది రీమేక్. ఈ సినిమాను తెలుగులోనూ సుధీర్ బాబు 'హంట్'  పేరుతో రీమేక్ చేశాడు. ఇక్కడా అది ఫ్లాప్ అయ్యింది. అలానే తమిళ రీమేక్ 'లవ్ టుడే' ను శ్రీదేవి చిన్నకూతురు 'లవ్ యాపా' గా చేసింది. ఈ మూవీలో ఆమీర్ ఖాన్ తనయుడు జునైద్ ఖాన్ హీరోగా నటించాడు. ఈ స్టార్ కిడ్స్ మూవీ జనాలపై ఎలాంటి ప్రభావం చూపలేకపోయింది. అలానే అజయ్ దేవ్ గన్, అతని మేనల్లుడు ఆమన్ దేవ్ గన్ నటించిన 'ఆజాద్'  చిత్రానిదీ అదే దారి... ఇలా పలు పరాజయాలతో జనవరి మాసం, ఫిబ్రవరి మొదటి వారం నీరసంగా వెళ్ళిపోయాయి.ఈ నేపథ్యంలో ఫిబ్రవరి 14న వచ్చిన 'ఛావా' పై జనాలు భారీ ఆశలు పెట్టుకున్నారు. అయితే మూవీ విడుదల కాగానే జాతీయ మీడియా ఈ సినిమాపై పెదవి విరిచింది. కొందరు విమర్శకులు మాత్రం 'ఛావా'పై ప్రశంసల వర్షం కురిపించారు. ముఖ్యంగా విక్కీ కౌశల్  నటన అద్భుతంగా ఉందని కితాబిచ్చారు. అతని భార్య యేసు బాయిగా నటించిన రశ్మికా మందణ్ణకు స్క్రీన్ స్పేస్ ఎక్కువగా లభించకపోయినా... కనిపించిన సన్నివేశాల్లో బాగా చేసిందని అభినందించారు. ఇందులోని కొన్ని సన్నివేశాలు గూజ్ బంప్స్ తెప్పిస్తే, మరికొన్ని సన్నివేశాలు కన్ళీళ్ళు తెప్పించాయని అన్నారు. నిదానంగా 'ఛావా' జనాలకు ఎక్కేయడం మొదలైంది. ఇప్పుడీ సినిమాను జనాలు గుంపులు గుంపులుగా చూస్తున్నారు. ఉత్తరాదినే కాకుండా దక్షిణాదిన ముఖ్యంగా తెలంగాణ, ఆంధ్రాలో ఈ సినిమాను ప్రేక్షకులు ఆదరించడం మొదలెట్టారు. థియేటర్లలో 'జై శివాజీ జై భవానీ, శంభాజీ మహారాజ్ కీ జై' అంటూ యువత నినాదాలు చేస్తోంది.