by సూర్య | Sat, Jan 02, 2021, 11:39 AM

బోల్డ్ బ్యూటీ అరియానా గ్లోరీ గురించి ప్రత్యేకమైన వివరణ అవసరమే లేదు. భారీ రియాలిటీ షో బిగ్ బాస్‌తో సెలబ్రిటీ హోదా కొట్టేసింది ఈ చిన్నది. బిగ్ బాస్ సీజన్- 4 కంటెస్టెంట్‌గా ఎంట్రీ ఇచ్చిన తర్వాత సంచలనాలకు కేరాఫ్ అడ్రెస్‌గా ఉంటూ నిత్యం వార్తల్లో నిలుస్తోంది అరియానా. బోల్డ్‌గా మాట్లాడటం, బోల్డ్ కామెంట్స్‌ని పాజిటివ్‌గా స్వీకరించడం ఆమె నైజం. ఈ నేపథ్యంలోనే న్యూ ఇయర్ సందర్భంగా అభిమానులతో చిట్ చాట్ చేసిన అరియానా.. త్వరలోనే తన క్లోజ్ ఫ్రెండ్‌తో బిగ్ సర్‌ప్రైజ్ ఉంటుందని చెప్పి అందరి చూపు తనవైపు తిప్పుకుంది.

బిగ్ బాస్ లోకి ఎంటరయ్యాక తనదైన మాట్లాతీరు, ఆట పాటలతో బుల్లితెర ప్రేక్షకుల ఆదరాభిమానులు చూరగొంది అరియానా. హౌస్‌లో నిజాయితీగా ఉంటూ ముక్కుసూటి మాటలతో బోల్డ్ బ్యూటీగా అట్రాక్ట్ చేసి ఫైనల్ ఎపిసోడ్ దాకా తన జర్నీ కొనసాగించింది. టాప్-5 కంటిస్టెంట్లలో ఒకరిగా నిలిచిన ఆమె.. చివరకు నాలుగో స్థానంలో నిలిచి బిగ్ బాస్ హౌస్ నుంచి బయటకొచ్చింది. ఆ తర్వాత వరుస ఇంటర్వూలు ఇస్తూ తన అభిమానులతో బిగ్ బాస్ ముచ్చట్లతో పాటు తన వ్యక్తిగత విషయాలను పంచుకుంటోంది.

ఇక న్యూ ఇయర్ సందర్భంగా జనవరి 1 (శుక్రవారం) రోజు లైవ్ చాట్ చేసిన ఆమె.. త్వరలోనే బిగ్ సర్‌ప్రైజ్ ఇవ్వబోతున్నానంటూ ఓపెన్ అయింది. ఈ చాట్‌లో భాగంగా 'సోహెల్ అన్న గురించి చెప్పండి' అని ఓ నెటిజన్ అరియానను అడగగా.. ''అందరూ అనుకుంటున్నట్లు మా మధ్య ఎలాంటి గొడవలు లేవు. వాడు నా క్లోజ్ ఫ్రెండ్. అంతేకాదు త్వరలోనే మేమిద్దరం కలిసి ఒకటి చేయబోతున్నాం. మీ అందరికీ భారీ సర్‌ప్రైజ్ ఇవ్వబోతున్నాం'' అని తెలిపి ఇరువురి అభిమానుల్లో కుతూహలం రేపింది అరియానా.

గతంలో యాంకర్‌గా పని చేసిన అరియానా ఓ యూట్యూబ్ ఛానెల్‌ కోసం సంచలన దర్శకుడు రాంగోపాల్ వర్మను ఇంటర్వ్యూ చేసింది. ఇందులో ఆర్జీవీ 'నిన్ను బికీనీలో చూడాలనుంది' అని ఆమెను కామెంట్ చేయడంతో ఒక్కసారిగా పాపులర్ అయింది. ఆ క్రేజ్‌కి బిగ్ బాస్ రెక్కలు తొడిగింది. సో.. చూడాలి మరి రానున్న రోజుల్లో అరియానా హంగామా ఎలా ఉండనుందనేది!.