by సూర్య | Thu, Oct 08, 2020, 04:41 PM

మనదేశంలో క్రీడల్లో క్రికెట్ కు వున్న క్రేజ్ అంతాఇంతా కాదు. కొందరు క్రికెటర్లకు సినీ తారలకన్నా ఎక్కువ పాప్యులారిటీ ఉంటుందనడంలో అతిశయోక్తి కూడా లేదు. అందుకే, సెలబ్రిటీ క్రికెటర్ల జీవితకథలతో నిర్మించిన బయోపిక్ లకు మంచి ఆదరణ లభిస్తోంది. ఈ క్రమంలో ప్రముఖ స్పిన్ బౌలర్, శ్రీలంకకు చెందిన తమిళుడు అయినా ముత్తయ్య మురళీధరన్ పై కూడా ఇప్పుడు ఓ బయోపిక్ రూపొందుతోంది.

ప్రముఖ తమిళ నటుడు విజయ్ సేతుపతి ఇందులో మురళీధరన్ గా టైటిల్ రోల్ పోషిస్తున్నాడు. ఇందుకోసం ఆయన క్రికెట్ లో శిక్షణ కూడా తీసుకున్నాడు. అందులో భాగంగా మురళీధరన్ వద్ద స్పిన్ మెళకువలను కూడా తెలుసుకున్నాడు. ఈ చిత్రానికి '800' అనే గమ్మత్తయిన టైటిల్ని నిర్ణయించారు. మురళీధరన్ టెస్టు క్రికెట్లో 800 వికెట్లు తీసి రికార్డు సృష్టించిన వైనానికి సంకేతంగా ఈ టైటిల్ని నిర్ణయించారు.

ఇక, ఇటీవలి లాక్ డౌన్ వల్ల వాయిదా పడిన ఈ చిత్రం షూటింగును త్వరలో మొదలుపెడుతున్నారు. ఈ లోగా ఈ నెల 13న ఈ చిత్రం ఫస్ట్ లుక్, మోషన్ పోస్టర్ ను విడుదల చేయడానికి సన్నాహాలు చేస్తున్నారు. శ్రీపతి దర్శకత్వం వహిస్తున్న ఈ '800' చిత్రంలో మలయాళ నటి రజిశ విజయన్ కథానాయికగా నటిస్తోంది. ఈ చిత్రంలో మురళీధరన్ అంతర్జాతీయ క్రికెట్ కి చేరుకోక మునుపు పడ్డ కష్టాలను, అప్పటి సంఘటనలను ముఖ్యంగా చూపిస్తారట.