పవన్ కళ్యాణ్, ఓ వైపు రాజకీయాలతో ఫుల్ బిజీగా ఉంటూనే.. ఏపీలో ఎన్నికలకు ఇంకా సమయం ఉండటంతో ఈ గ్యాప్‌లో వరుసగా సినిమాలు చేయాలని నిర్ణయించాడు. అందులో భాగంగా MCA ఫేమ్ వేణు శ్రీరామ్ దర్శకత్వంలో హిందీలో అమితాబ్ బచ్చన్ ప్రధాన పాత్రలో నటించిన ‘పింక్’ సినిమాను తెలుగులో ‘వకీల్ సాబ్’ టైటిల్‌తో తెరకెక్కిస్తున్నారు.  ఇప్పటికే విడుదలైన ఈ సినిమా పోస్టర్‌కు మంచి రెస్పాన్స్ వచ్చింది. ‘అజ్ఞాతవాసి’ తర్వాత దాదాపు రెండేళ్ల గ్యాప్ తర్వాత వస్తోన్న ఈ సినిమాపై ప్రేక్షకుల్లో భారీ అంచనాలే ఉన్నాయి. తాజాగా ఈ సినిమాకు సంబంధించిన మరో పోస్టర్ సోషల్ మీడియాలో వైరల్ అవుతోంది. ఒక చేత్తో ఫైల్స్, మరో చేతిలో లెదర్ బ్యాగ్ పట్టుకొని కోర్టులో కేసు వాదించడానికి వెళ్తుతున్నట్టుగా ఈ పోస్టర్ ఉంది. అచ్చం అఫీషియల్ పోస్టర్‌లా ఉన్న దీన్ని ఒక ఫ్యాన్ క్రియేట్ చేసారు. ఈ చిత్రాన్ని ముందుగా మే 15న సమ్మర్ కానుకగా రిలీజ్ చేస్తున్నట్టు ప్రకటించినా.. కరోనా వైరస్ నేపథ్యంలో ఈ సినిమాను ఎపుడు విడుదల చేసేది త్వరలోనే అనౌన్స్ చేయనున్నారు.. శ్రీవెంకటేశ్వర క్రియేషన్స్‌ పతాకంపై దిల్‌రాజు ఈ చిత్రాన్ని నిర్మిస్తున్నారు. పవన్‌కల్యాణ్‌ 26వ చిత్రంగా తెరకెక్కుతున్న ఈ సినిమాపై అభిమానుల్లో ఎంతో ఆసక్తి నెలకొని ఉంది. పవన్ కళ్యాణ్ తన సెకండ్ ఇన్నింగ్స్‌లో ఇపుడు వరుస సినిమాలు చేస్తున్నారు. అందులో క్రిష్, హరీష్ శంకర్, బాబీ, డాలీ, త్రివిక్రమ్ సినిమాలు లైన్‌లో ఉన్నాయి.