by సూర్య | Mon, Mar 09, 2026, 10:39 PM

2012లో విడుదలైన దండుపాళ్యం సినిమాను ప్రేక్షకులు అంత ఈజీగా మర్చిపోలేరు. కన్నడ బాక్సాఫీస్‌ను షేక్ చేసిన ఈ చిత్రం ఆ ఏడాది అత్యధిక వసూళ్లు సాధించిన సినిమాల్లో ఒకటిగా నిలిచింది. రికార్డు స్థాయిలో కలెక్షన్లు సాధించిన ఈ మూవీ అనేక థియేటర్లలో 100 రోజులకు పైగా ప్రదర్శితమైంది. కేవలం కన్నడలోనే కాకుండా తెలుగుతో పాటు ఇతర భాషల్లో కూడా ఈ సినిమా సంచలన విజయాన్ని అందుకుంది. ముఖ్యంగా తెలుగులో కూడా మంచి కలెక్షన్లు రాబట్టి ప్రేక్షకుల ఆదరణ పొందింది. క్రైమ్ థ్రిల్లర్ జానర్‌లో కొత్త ఒరవడిని తీసుకొచ్చిన ఈ సిరీస్‌లో మొత్తం నాలుగు సినిమాలు విడుదలయ్యాయి. దండుపాళ్యం 2 2014లో విడుదల కాగా, తరువాత దండుపాళ్యం 3 కూడా ప్రేక్షకుల ముందుకు వచ్చింది. కొన్ని సంవత్సరాల తర్వాత దర్శకుడు కె.టి. నాయక్ తెరకెక్కించిన దండుపాళ్యం 4 2019లో విడుదలైంది.దండుపాళ్యం అనే పేరు వినగానే క్రూరమైన గ్యాంగ్ కథ గుర్తుకు వస్తుంది. దర్శకుడు శ్రీనివాస రాజు రూపొందించిన ఈ క్రైమ్ థ్రిల్లర్ మూవీలో పూజా గాంధీ, రవి కాలే, మకరంద్ దేశ్‌పాండే, పి. రవిశంకర్, రఘు ముఖర్జీ, ప్రియాంక కొఠారి, జయదేవ్ మోహన్ తదితరులు కీలక పాత్రల్లో నటించారు. ముఖ్యంగా గ్యాంగ్ నాయకురాలు లక్ష్మీ పాత్రలో నటించిన పూజా గాంధీ ఈ సినిమాకు హైలైట్‌గా నిలిచింది. బయటకు అమాయకంగా కనిపిస్తూనే క్రూరంగా హత్యలు చేసే పాత్రలో ఆమె నటన ప్రేక్షకులను భయపెట్టేలా చేసింది. కొన్ని సన్నివేశాల్లో బోల్డ్‌గా నటించి కూడా మంచి గుర్తింపు సంపాదించింది.అయితే సినిమాలో చాలా రఫ్‌గా, క్రూరంగా కనిపించిన పూజా గాంధీ నిజ జీవితంలో మాత్రం చాలా అందంగా, హుందాగా ఉంటుంది. ఆమె 2001లో హిందీ చిత్రం ఖత్రోన్ కే ఖిలాడీతో సినీరంగంలోకి అడుగుపెట్టింది. ఆ తరువాత ముంగారు మలే, మిలనా, కృష్ణ, తాజ్ మహల్, బుద్ధివంత, గోకుల వంటి సినిమాల్లో నటించి మంచి గుర్తింపు తెచ్చుకుంది. అలాగే దండుపాళ్యం సిరీస్ సినిమాల్లో కూడా కీలక పాత్రలో నటించింది. కన్నడతో పాటు తెలుగు, హిందీ చిత్రాల్లోనూ నటించిన ఆమె చివరిగా తగ్గేదేలే అనే తెలుగు సినిమాలో కనిపించింది. ప్రస్తుతం మాత్రం సినిమాల్లో పెద్దగా యాక్టివ్‌గా కనిపించడం లేదు.వ్యక్తిగత జీవితానికి వస్తే, పూజా గాంధీ 2012లో పారిశ్రామికవేత్త ఆనంద్ గౌడతో నిశ్చితార్థం చేసుకుంది. అయితే కొద్ది రోజులకే ఇద్దరూ విడిపోయారు. అనంతరం 2023లో తన చిన్ననాటి స్నేహితుడు, వ్యాపారవేత్త విజయ్ ఘోర్పడేతో వివాహం చేసుకుంది. ప్రస్తుతం ఆమె తన వైవాహిక జీవితాన్ని ఆనందంగా గడుపుతోంది. సినిమాలకు దూరంగా ఉన్నప్పటికీ సోషల్ మీడియాలో మాత్రం యాక్టివ్‌గా ఉంటూ అభిమానులతో టచ్‌లో ఉంటుంది. అలాగే పలు సామాజిక సేవా కార్యక్రమాల్లో కూడా పాల్గొంటోంది. ఇటీవల ఆమెకు సంబంధించిన కొన్ని ఫోటోలు, వీడియోలు సోషల్ మీడియాలో వైరల్ అవుతున్నాయి. వాటిని చూసిన నెటిజన్స్ “ఇదేనా దండుపాళ్యం హీరోయిన్?” అంటూ ఆశ్చర్యపోతూ కామెంట్లు చేస్తున్నారు.